USD
АЛМАТЫ. 8 қыркүйек. Алматы дәрігерлері жаңа туған шарананың денесінен екі келі тартатын ірі ісікті алып тастау отасын жасады. Бұл туралы Денсаулық сақтау министрлігі баспасөз қызметі дерегіне сүйенген rast.kz хабарлайды.
Оқиға тамыздың 18-інде перзентханада салмағы төрт келіден асатын қыз баланың өмірге келуінен басталады. Туған бойда оның сегізкөз-құйымшағы тұсында үлкен түзіліс бар екені байқалады.
Осылайша нәресте өмірге келген алғашқы сәттен бастап өмір үшін күрес басталды.
Туа біткен мұндай түзіліс нәресте туған кезде қатерлі ісік болып саналмаса да, өмірінің алғашқы алты айында қатерлі ісікке айналуы әбден мүмкін еді. Сондықтан мұндай түзілісі бар нәрестеге отаны созбалаңға салмай жасау қажет.
Бала туғаннан кейін бірнеше сағат ішінде неонаталдық реаниматологтар мен хирургтерден құралған топ перзентханаға барып, нәрестені Алматыдағы балалар шұғыл медициналық көмек көрсету орталығына жеткізді. Қыз бала жаңа туған нәрестелер реанимациясы бөліміне жатқызылып, күрделі отаға дайындық қолға алынды.
Дәрігерлер келесі күні ісікті алып тастайды.
«Сегізкөз-құйымшақ аймағында орналасқан тератоманың құрамында сүйек, жұмсақ тіндер және кистозды қуыс секілді түрлі тін бар. Бұл тәжірибеміздегі ең күрделі отаның бірі болды. Ісіктің салмағы екі келі болды, яғни нәрестенің өз салмағымен бірдей деуге болады. Қыздың туған кездегі салмағы төрт келі еді, демек, оның тең жартысын ісік құраған. Ота сәтті өтті. Ісікті алып тастағаннан кейін бірден пластика жасадық. Тігіс орны білінбейтіндей етіп қалпына келтірілді. Болашақта бұл нәрестеге ешқандай қолайсыздық тудырмайды. Қазір баланың жағдайы жақсы, ол үйіне шыққалы жатыр», – деді балалар шұғыл медициналық көмек көрсету орталығы бөлімшесінің меңгерушісі Саматбек Мырзахмет.
Отаны хирург Саматбек Мырзахмет, ассистент Бегалы Төребек, анестезиолог-реаниматолог Ұлықпан Әлсейітов жасады. Нәрестені дәрігерлер Айжан Сексенбаева мен Едгор Сайдакбаров емдеді.
Операция екі сағаттан астам уақытқа созылды. Хирургтер мен реаниматологтардың аса мұқият әрі дәл жұмысының арқасында нәресте салмағы екі келі болатын алып ісіктен арылды.
Тератома нәрестенің ана құрсағындағы кезінде қалыптасқан. Ол жүктіліктің 20-аптасында жүргізілген скрининг кезінде анықталған. Ата-анасы жүктілікті сақтап қалу үшін қолдан келгеннің бәрін жасайды. Бірнеше рет дәрігерлер кеңесіне қатысып, балалар шұғыл медициналық көмек көрсету орталығының хирургтерінен кеңес алады. Дәрігерлер жүктілік бойы ана мен баланың денсаулығын мұқият бақылап отырған.
