«Көптоғай» ауылындағы дүрлігіске нүкте қойылған сияқты
АТЫРАУ. 19 сәуір. Бұдан екі күн бұрын Атырау облысының Құрманғазы ауданындағы «Көптоғай» ауылы маңында туған дүрлігістің түйіні енді тарқатылды. Бұл туралы «Ақ Жайық» басылымы хабарлады.
Әңгіме Қиғаш өзенінің бойына орналасқан «Көптоғай» ауылына 14 сәуір күні арғы беттегі Ресей жерінен әскерилер келіп, су жағалауын бойлай шекаралық қоршаулар салып тастағаны туралы болып отыр. Жергілікті тұрғындар осыған байланысты шу көтеріп, тосын әрекетке өре қарсы тұрған. Сөйтіп, аяқ астынан шекара дауы басталып кеткен. Осыдан кейін Қазақстанның түкпір-түкпірінен наразылық толқыны туа бастады. Осыған байланысты ел аумағында жаппай митинг өткізетін уақыт та белгіленіп қойылған болатын.
Мұның нақты тиянақты жауабын бүгін Қазақстан Ұлттық қауіпсіздік комитеті берді
«Биылғы жылы 17 сәуірде жекелеген электрондық ақпараттық ресурстарда Атырау облысында жүргізіліп жатқан акциялар туралы бейне жазба таратыла бастады. Ұлттық қауіпсіздік комитеті бұл ақпараттың шындыққа жанаспайтынын ресми түрде мәлімдейді. «Қалқан-2021» оқу-жаттығуларынан әлеуметтік желілерде таратылған бейне материал», – делінген ҰҚК баспасөз қызметінің хабарламасында.
Осыған байланысты ҰҚК баспасөз қызметі отандық БАҚ редакцияларынан осындай материалдарды қайта басып шығару немесе оларға сілтеме жасау кезінде растау немесе түсініктеме алу үшін Ұлттық қауіпсіздік комитетіне жүгінуді сұрайды, жалған ақпарат таратпауға шақырады.
