USD
МИНСК. 19 сәуір. Беларусь президенті Александр Лукашенко өзі мен ұлдарының өмірлеріне қастандық жасауға әзірліктің жолы кесілгенін мәлімдеді. Бұл туралы «Пул первого» telegram-арнасы хабарлады.
Беларусь президенті өзінің насихатын жүргізетін арнада мұның жайын өзі айтып берді.
«Олардың жоспарлары бір баланы, екеуін, үшеуін алып кету болған, ыңғайына қарай. Сосын «жертөлеге отырғызып» қоймақ болған. Айтқандай, бұған дайындық Гомель облысында жүргізілген, сол жақтан жертөлені де жасап алған. Біз осы топты қолға түсірдік. Олар бізге осының бәрін көрсетіп, жоспарлары жайын айтып берді. Мен үндеген жоқпын. Сосын бұл іске шетелдік барлау қызметінің, бәрінен бұрын ЦРУ, ФБР секілді құрылымдардың қатыстары бары анықталды. Бірақ нақты қайсысының жұмыс жасағанын білмеймін. Біз олардың Минскіге келіп, президенттің балаларымен шұғылданбақ ниеттері болғандарын айғақтадық», – деді ол.
Осыдан кейін ол «хабардар болып отыруы» үшін Мәскеумен байланысқа шығып, болған жайды түгел айтып берген. Нәтижесінде АҚШ-тан келген «агентура» Мәскеуде қолға түскен.
Беларусьте осындай актінің – президентті өлтіруге бағытталған қарулы бүліктің ауыздықталғаны туралы сюжет ОНТ арнасынан көрсетілді. Онда бүлікке Беларусь азаматтарымен бірге шетелдіктердің де қатысқаны туралы айтылады.
Мемлекеттік төңкерісті басты ұйымдастырушы ретінде АҚШ-тың азаматтығы бар белорус адвокаты Юрий Зенковичтің есімі аталып отыр. БелаПАН-ның хабарлауынша, ол 14 сәуір күні Мәскеуде ұсталған.
Лукашенко сондай-ақ мемлекеттік төңкеріс жасау мен өзін өлтіруге бағытталған операцияға қатысушылар арасында «Белорусский народный фронт» партиясының төрағасы Григорий Костусевтің де бар екенін білдірді. Ол бірнеше күннен кейін Могилев облысындағы Шклов қаласында қолға түскен.
