Индонезияда «Boeing 737» ұшағы апатқа ұшырады

ДЖАКАРТА. 9 қаңтар. Бүгін күндіз Индонезияның байтағы – Джакарта қаласынан ұшып шыққан «Boeing 737» ұшағының Лаки аралы маңында апатқа ұшырағаны белгілі болды. Бұл туралы РИА «Новости» хабарлады.

Индонезияның «Sriwijaya Air» авиакомпаниясына қарайтын ұшақтың бортында 62 адам болған. Олардың 46-сы ересек кісілер болса, 7-і балалар мен сәбилер екен. Сондай-ақ екі пилот және 4 бортсерік бар. Ешкім де тірі қалған жоқ.

Ал Би-Би-Сидің ақпары бойынша, бортта 50 жолаушы болған, олардың 10-ы балалар көрінеді.

Ұшақ Понтианак қаласына ұшып бара жатқан.

Алдын ала мәліметтер бойынша, лайнердің қаңқалары мен қаза тапқан жолаушылардың бір бөлігінің денелері табылған.

Индонезия әскери-әуе күштері апат орын алған бойда іздеу-құтқару жұмыстарын жүргізу үшін онда екі тікұшақ жібеген.

Әзірге апаттың неден болғаны анықталған жоқ.

Солихин есімді жергілікті балықшы ұшақтың қалай құлағанын көрген екен. Ол лайнердің найзағай сияқты жарқ етіп, теңізге құлап түскенін айтады.