USD
АШХАБАД. 12 қараша. Түрікменстан байтағында президент Гурбангулы Бердымухамедовтің итіне алтын жалатылған ескерткіш ашылды. Бұл туралы «Хроника Туркменистана» хабарлады.
Биіктігі 15 метрлік алтын жалатылған алып ортаазиялық овчарка – алабай итінің ескерткіші 10 қараша күні бой көрсетті. Оның салтанаты рәсіміне мемлекет басшысының өзі қатысты.
Ескерткіштің өзінің биіктігі – 6 метр болса, тұғыры 9 метрге барады екен. Алтынмен апталған алабайдың сом тұлғасы алып алаңның ортасында тұр. Ол көшенің арғы басынан ерекше көзге түседі.
Алабайға ескерткіш қою идеясы Бердымухамедовтен шығыпты. Ол оған өзінің алабайы бейнесін салдырған. Осы арқылы халықтың тағдырында ерекше рөл ойнаған барлық иттерге құрмет көрсетпекші болыпты.
Журналистер түрікмен президентінің 2019 жылы «Түрікмен алабайы» деген кітапты өзі жазып, баспадан шығарғанын айтады. Ол кітаптың тұсаукесерін өзі өткізіпті. Сонда өзі шығарған өлеңді де оқыған.
Бердымухамедов бұл күні «Түрікмен алабайына» ескерткіш ашумен бірге 12 қабаттық элиталы жаңа тұрғын үй мен «Gül zemin» сауда орталығының да лентасын кесіпті.
