Қызылордада «Ардагерлер дауысы» атты қоғамдық бірлестік құрылды
ҚЫЗЫЛОРДА. 27 қазан. Бүгін Қызылордада «Ардагерлер дауысы» қоғамдық бірлестігін құруға арналған құрылтай жиналысы болды. Бұл туралы rast.kz хабарлады.
Осыған арналған құрылтайшылардың жалпы жиналысы «Номад Палас» ресторанының конференц-залында өтті.
Жиынды бастамашылар тобының мүшесі Жарылқасын Шәріпов ашып, құрылғалы тұрған қоғамдық бірлестіктің мақсаты мен міндеттері туралы кеңінен әңгімелеп берді.
Бірлестіктің мақсаты азаматтық қоғамның аймақта орын алып жатқан, күн тәртібінде тұрған алуан түрлі өзекті оқиғалар мен бұрыннан қордаланып, қалыптасып қалған төзбестік жағдайлар туралы көзқарастары мен пікірлерін тиісті орындар мен көпшілікке жеткізіп тұру болып табылады. Бұлардың ішінде аймақ тұрғындарын күнделікті алаңдатып, толғандырып жүрген жағдаяттардан бастап, өңірдің бүгіні мен болашағы үшін орны мен маңызы айрықша зор кең ауқымды мәселелер бар.
«Бізді мұндай шешімге келуге уақыттың өзі жетелеп алып келді. Біз – осы облыстың байырғы тұрғындарымыз, өміріміз жеткенінше осында тұра береміз, ешқайда кетіп қалайын деп жатқан жоқпыз, біздің ұрпақтарымыздың да дені осында, сондықтан бұл өңірдің ертеңі алаңдатпай қоймайды. Ал тап олай алаңдайтын жағдайлар қазір жетіп-артылады. Бүгін осында бас қосып отырған құрылтайшылардың бәрі де кезінде облыс аумағында халық шаруашылығының алуан түрлі салаларында жұмыс атқарған, жергілікті жердің өткені мен ерекшеліктерін ешкімнен кем білмейтін белгілі адамдар. Сол себепті де біз айналамызда болып жатқан кейбір кереғар көріністерге көз жұмып, қарап отыра алмаймыз. Бір топ ардагерлер қауымы аталмыш бірлестіктің туы астында сол дауыстарымызды ұдайы жеткізіп отыру үшін бас қосып отырмыз», – деді Жарылқасын Шәріпов.
Құрылтай жиналысына қатысушылар құрылғалы отырған қоғамдық бірлестіктің жұмысы, мақсаты мен міндеттері жөнінде өз пікірлерін ортаға салып, ой бөлісті. Олардың барлығы да мұндай бірлестіктің керек екенін бір ауыздан қолдады.
Жиында кез келген өркениетті қоғамда қоғамдық бірлестіктердің көп болатыны, олардың қай ел мен аймақта да қоғамдық ойдың қозғаушы күші болып саналатыны айтылды. Сол сияқты жаңадан құрылып жатқан бірлестікті облыстық не қалалық ардагерлер кеңестерінің іс-әрекеттерін қайталайтын баламалы ұйым ретінде қарастыруға болмайды. Олар тікелей ардагерлермен жұмыс жасасатын болса, бұл бірлестіктің мүлде ондай миссиясы жоқ.
Құрылтай жиналысында «Ардагерлер дауысы» қоғамдық бірлестігінің жарғысы қабылданды.
Құрылтайшылар бірлестіктің төрағасы етіп Жарылқасын Шәріповті, төрағаның орынбасары етіп Ибрагим Әбибуллаевты, атқарушы директоры етіп Ерұлан Өмірсеріковті сайлады. Сол сияқты тексеру комиссиясының төрағасы болып Қалхазбек Әжібеков сайланды.
