USD
СЕУЛ. 23 сәуір. Корея Республикасы қалаларының бірінде заңсыз жүрген Қазақстан азаматтары сонда жергілікті жастармен жаппай төбелеске қатысқан. Бұл туралы zakon.kz хабарлады.
Оқиға 19 сәуір күні болған. Қазақстан жағынан төбелесушілердің бәрі осында келген еңбек мигранттары болып шықты. Олардың төбелес кезінде суық қару, атап айтқанда, пышақ қолданғандары анықталды.
Қазақстан Сыртқы істер министрлігінің ресми өкілі Айбек Смадияровтың мәліметінше, осы оқиғадан соң жергілікті полиция қызметкерлері біздің еліміздің 19 азаматын ұстаған.
«Қазір Қазақстанның Корея Республикасындағы елшілігінің консулдығы болған оқиғаның егжей-тегжейін анықтап жатыр. Біздің дипломаттар бұл мәселені үнемі бақылауда ұстап, жергілікті полиция және көші-қон қызметімен байланыс орнатқан», – деді Смадияров.
Мұндай жанжалдың орын алғаны бір күн бұрын белгілі болды. Оның барысы туралы видео JEXENNEWS Telegram каналында жарияланған екен.
