USD
АСТАНА. 11 маусым. Қазақстандық шахматшы, әлем чемпионы Спорт және туризм министрлігінің өзіне қарсы жауабына орай ойын қатқыл жеткізді. Бұл туралы Nur.kz ақпарына сүйенген rast.kz хабарлайды.
Спортшы кеше өзінің Президентке жазған хаты жарияланғаннан кейін бүгін жедел брифинг өткізіп, «жағдайды жұртқа жеткізбекші» болған және ондағы өзіне қарата айтылған өктем пікірлерге байланысты жедел жаңа пост жариялады. Ал ведомство тарапынан берілген мәлімдемеде қазір спорттың басыңқы, яғни беделді түрлеріне көбірек көңіл бөлінетіні атап өтіліпті. Олар, әлбетте, бұл «элиталы» спорт түрлерінің шашақты шаңырағына шахматты кіргізе алмайтындарын ашық көңілдерімен аңқылдап айтыпты.
«Интеллект басымдыққа ие емес пе? Мен Спорт министрлігінің ресми жауабын мұқият оқып шықтым. «Шахмат беделі басым емес спорт түрлеріне жатады» депті. Мойындауым керек, мен бұл тіркесті бірнеше рет қайта оқыдым. Жақында ғана Қазақстан Президенті Қасым-Жомарт Тоқаев елдің стратегиялық бағытын белгілегенде: «Күшті ұлт күшті интеллекттен басталады. ХХІ ғасырда шикізат емес, білім басты ресурсқа айналуда» деген еді», – деп жазды Бибісара Асаубаева осыған орай.
Ол әлемнің жетекші елдері үшін шахматтың жай спорттан да көп артық нәрсе болып саналатынын еске салады. Бұл – стратегиялық ойлау, зияткерлік капитал және мемлекеттің бәсекеге қабілеттілігі нышандарының бірі.
«Егер шахмат басымдық болып табылмаса, мынадай қарапайым сұрақ туындайды: онда Президент мені қандай еңбегім үшін II және III дәрежелі «Барыс» ордендерімен марапаттады? Бүгін мен әлемдік рейтингте 5-ші орында тұрмын. Спорт министрлігінің жауабынан мынадай қарапайым қорытынды шығады: менің ата-анам – шенеуніктер емес, елдің зияткерлік болашағының нағыз патриоттары және инвесторлары. Қазақстанның болашағы зияткерлікпен, біліммен, ғылыммен және адами капиталдың сапасымен айқындалатын болады», – деп ойын ұштайды шахматшы бұдан әрі.
«Маңызды мәселе: Спорт министрлігінің бұл ұстанымы Президенттің бағытына сәйкес келе ме екен? Себебі шахматқа деген көзқарас – бұл интеллектке деген көзқарас. Интеллектке деген көзқарас – елдің болашағына деген көзқарас. Шамасы, Спорт министрі бұдан басқа бағытты ұстанатын сияқты», – деп жазды спортшы.
Естеріңізге сала кетейік, бір күн бұрын қазақстандық шахматшы Бибісара Асаубаева Президент Қасым-Жомарт Тоқаевқа видео жолдап, көмек сұраған болатын. Ол сүбелі министрлік тарапынан көрсетілетін көмектің мардымсыз екеніне шағымданды және жаңа министр келгелі бері жалақысы үш есеге төмендеп кеткенін мәлімдеді.
Ал Спорт және туризм министрлігінің шұғыл шығарған қорытындысы сол, ол бүгін дереу, жалма-жан брифинг өткізіп, шахматшыға жұмсалған шығындардың есеп-қисабын бүкіл елді жайып салуды жөн көріпті. Жиында вице-министр Серік Жарасбаев шахматшы Бибісара Асаубаеваның жалақысы үш есеге дейін азайтылғанын қапысыз мойындайды. Ол мұның неліктен олай етілгенін де түсіндіріпті. «Басыңқылық» жайлы байлам осы жерде айтылса керек. Сөзінің арасына тағы «кейбір спортшылар қатты еркелеп кеткен» дегенді де қосып жіберіпті. Сірә, «Семіздікті қой көтереді» дегісі келген-ау…
