USD
МӘСКЕУ. 29 мамыр. Ресей Федерациясы Арменияда 7 маусым күні өтетін парламент сайлауында премьер-министрдің барлық мүмкіндіктерін құрту жолындағы науқанды бастап кетті. Бұл туралы The Moscow Times ақпарына сүйенген rast.kz хабарлайды.
Reuters агенттігінің хабарлауынша, Мәскеу сайлауда Никол Пашинянның қарсыластарын қолдау үшін Арменияға Ресейден 100 мың армян жіберуді жоспарлаған. «Жалған ақпарат тарату науқанына Кремльмен байланысы бар боттар желісі қатысады», деп жазады агенттік.
Ресей Армения премьер-министрі Никол Пашинянның 7 маусымда өтетін парламенттік сайлауда (Ұлттық жиналыс) қайта сайлану мүмкіндігін бүлдіру үшін бар күш-жігерін салып, қарқынын қауырт арттырды. Енді осы сайлауда қазіргі премьер-министрдің жеңіп шығуы армян халқы үшін де үлкен сын және баға болғалы тұр.
«Кремльдегілер Пашинянның жеңісі Ереванның батысқа жақындау бағытын бекітуі мүмкін деп қорқады», дейді агенттік. Оның мәліметі бойынша, әңгіме Ресейге бүйрегі бұратын кандитаттардың пайдасына жалған ақпарат тарату науқанын ұйымдастырып, Пашинянның қарсыластарына дауыс бергіздіру үшін Арменияға РФ-да тұратын жүз мың қаралы армянды аттандыру турасында болып отыр.
Батыстың үш шенеунігінің айтуынша, Мәскеудің Армения премьер-министрі тағынан қазіргі күндері ақшаны жылыстату және билікті басып алу жөнінде көпшілік алдында сөз сөйлегені үшін айыпталып, уақытша мырзақамаққа отырған ұлты армян, ресей-хай бизнесшісі Самвел Карапетянды көргісі келеді. Бірақ Карапетян өзінің таңылып отырған бұл айыптарды мойындап отырған жоқ.
Армяндарға шетелдерде жүріп дауыс беруге тыйым салынған. Қазір Ресейде 2 миллионнан астам хайлар (армяндар) тұрады. «Үш мәнбенің баяндауларына сәйкес, Ресей билігі шамамен 50 млн долларға (43 млн еуроға) 100 мың сайлаушыны Арменияға жіберуге құмбыл болып отыр» деп жазады Reuters. Кремль мамырдың ортасында Арменияның әр өңіріне баратын армяндардың квоталарын дайындап қойып, әкімгерлеріне дайындықтың қалай жүріп жатқаны жөнінде күн сайын есеп беріп тұруға міндеттеді.
Агенттік атап өткендей, Кремльдің жалған ақпар тарататын боттар жүйесі «Storm-1516» деп аталады. Үш мәнбе бұған Еуропа одағы мен Ұлыбритания тарапынан санкция алған ресейлік саяси консалтингтік және аналитикалық орталықтары тартылғанын, ішінде Украинаны қолдауға залал келтіру үшін бүліншілік ақпарларын таратумен шұғылданған атақты Social Design Agency (SDA) да бар екенін атап көрсетеді.
Американың жоғары лауазымды шенеунігін қосқандағы үш мәнбе сонымен қатар қазіргі күндері Никол Пашинянның өзіне қастандық ұйымдастырылып жатқанын, оның өмірі қауіпсіз емес екенін, сондықтан премьер-министрді қорғауға америкалық арнайы қызмет органдары да тартылғанын жеткізді.
Мамыр айының басында жүргізілген сауалдама Пашинянның «Азаматтық келісім» партиясы 30%-дық дауыспен сайлауда бірінші орын алатынын көрсетті. Ал Карапетянның «Күшті Армения» партиясы 6%-дық дауыспен екінші орынға шығады.
Пашинян өзінің қазіргі қызметіне 2018 жылы келген еді.
Армения 4 мамырда Еуропа саяси қоғамдастық саммитінде ондаған мемлекет басшыларын қабылдады, ал бір күннен кейін армян астанасында тарихта алғаш рет «Еуропа одағы – Армения» саммиті өтті. Кездесуге Украина президенті Володимир Зеленськийдің қатысуы Мәскеудің ерекше тітіркенуін тудырды. Ресей Федерациясының сыртқы істер министрлігі армян тарапының Зеленський үшін алаң беруін «мүлдем қолайсыз нәрсе» деп баағалады.
Ресей президенті Владимир Путин 9 мамырда Ереванның Еуропа одағы мен Еуразиялық экономикалық одақтың бірінің жағына шығуы керек екенін мәлімдеді.
«Армениядағы көптеген адамдар Путиннің сөздерін Ереванға қысымның күшеюі ретінде қабылдады, бұл кулуарлық дипломатия мен жасырын ымыраға келу уақыты артта қалған болуы мүмкін деген айқын белгіні көрсетеді», деп жазды DW тілшісі.
