USD
БІШКЕК. 21 мамыр. Қырғызстан Еуропа одағының «қара тізіміне» енгеннен кейін Ресеймен сауда жасайтын ондаған компанияны жауып тастады. Бұл туралы The Moscow Times ақпарына сүйенген rast.kz хабарлайды.
Қырғызстан билігі Ресейге қарсы батыс санкцияларын айналып өтті деп күдіктенген көтерме саудадағы, көліктегі және логистикадағы компаниялардың бәрінің қызметтерін тоқтатты.
Республиканың вице-премьері Данияр Амангелдиевтің айтуынша, АҚШ пен Ұлыбритания Бішкекке осы компаниялардың әрекеттері жөнінде нақты ақпар берген.
«Олар осындай тәуекелшілділіктер ишарасы бар екені жайлы хабарлағаннан кейін біз оған мән беріп, біршама тексеру жүргіздік. Сосын сол тексерудің қорытындысы бойынша 50 компанияның тіркеуін тоқтаттық», – деді ол.
Бірақ компаниялардың аттары аталмайды.
Еуропа одағының 20-шы санкциялар пакеті шеңберінде Қырғызстанға сандық басқарудағы еуропалық станоктарды, сондай-ақ маршрутизаторлар мен коммутациялық техниканы қоса алғанда, телеком жабдықтарын экспорттауға толық тыйым салынды. Брюссельдегілер мұны Ресейге қайта экспорттаудың жоғары қаупі бар екенімен түсіндірді және Қырғызстанға Ресейдің әскери-өнеркәсіптік секторына барып түсуі мүмкін тауарларды жеткізудің күрт өсіп бара жатқанына сілтеме жасады. Мәлімет бойынша, Еуропа одағынан Қырғызстанға жіберілген электроника импорты 2022-2025 жылдары 800%-дан астам өсіп кеткен.
Еуропа одағы санкцияларына Қырғызстаннан жекелеген компаниялар да ілікті. Олардың қатарында «Керемет Банк», «Капитал Банк Орталық Азия», сондай-ақ электроникамен, станоктармен және төлем инфрақұрылымымен байланысты компаниялар бар. Еуропа шенеуніктері де Қырғызстандағы криптовалюта платформаларының қызметіне наразылық білдірді. Өткен жылы жұмыс істей бастаған grinex крипто биржасы ерекше назар аударды.
