Трамп: Маған Путиннен гөрі Зеленськийді көндіру қиын болып тұр
УАШИНГТОН. 15 наурыз. АҚШ президенті Дональд Трамп Ресей диктаторы Путинді ырқына көндіре алатынын, ал Украина лидері Зеленський жөнінде ондай сенімі жоқ екенін айтты. Бұл туралы DW ақпарына сүйенген rast.kz хабарлайды.
Америка президенті Украинадағы соғысқа қатысты Зеленскиймен бейбітшілік келісіміне келу Путинге қарағанда қиынырақ екенін мәлімдеді. Соғысты тоқтату жөніндегі келіссөздер келесі кездесудің орны хақында келіспеушілік тууына сәйкес тоқтап қалған.
АҚШ президенті Дональд Трамп Украина президенті Володимир Зеленськийдің бейбітшілік келісіміне асыға қоймайтынын алға тартып, сынап алды. «Мен Зеленськийдің келісім жасағысы келмейтініне таң қаламын. Зеленськийге келісім жасау керек екенін айтыңыздар, себебі Путин келісімге келуге дайын», – деді Трамп 15 наурыз, жексенбі күні NBC News телеарнасына берген сұхбатында.
АҚШ президентінің айтуынша, Зеленськиймен келісімге келу Путинге қарағанда «әлдеқайда қиын». Трамп сонымен қатар Зеленськийдің АҚШ пен оның одақтастарына Таяу Шығыста Иран дрондары шабуылдарын тоқтатуға көмектесу жөніндегі ұсынысымен келіспеді. «Бізге ең соңынан ғана көмек көрсете алатынадам, ол – Зеленський» деді Ақ үйдің қожайыны.
Зеленський Киевтің жаңа келіссөздер кезеңіне дайын екенін мәлімдеп, 18-19 наурызда кездесу өткізуді ұсынды, бірақ оның өтетін орны туралы келісу мүмкін болмады: Америка тарап кездесуді өз жерінде – Майамиде немесе Уашингтонда өткізуді талап етті. Зеленский келісті. Ресей өз кезегінде Түркияны немесе Швейцарияны ұсынды, бірақ америкалықтар Таяу Шығыстағы соғыстың бұларды елден тысқары кетуге мүмкіндік бермейтінін айтып, бас тартты.
Бір нәрсе айқын: Трамп пен Путин бастаған командалардың ұсыныстарының дені бейбітшілікке қол жеткізу үшін Украинаның өз жерін басқыншыларға беріп қоюына апарып соқтырады. Әлбетте, мұндай ұсыныспен Украина лидері келіспейді, ол өз жерінің бір метрін де жау қолында қалдыруға ықтиярлы емес.
