USD
КИЕВ. 7 наурыз. Украина президенті Володимир Зеленський егер «Еуроодақтағы бір адам» Еуропаның Киевке көмегіне тосқауыл қоя берсе, оның мәнзілін Украина Қарулы күштеріне беретінін айтты. Бұл туралы DW ақпарына сүйенген rast.kz хабарлайды.
Зеленський сөзінің видеосын 5 наурыз күні UNIAN ақпарат агенттігі Telegram-да жариялады.
«Біз Еуропа одағындағы бір адамның Киевке 90 миллиард еуро бөлінуін бұл жолы бұғаттамайтынына үміттенеміз», деді Украина президенті.
Зеленський олай болмаған күнде Украина Қарулы күштерінің онымен «өз тілінде» байланысуы мүмкін екенін айтты.
Өзінің сөзінде украин лидері «бір адамның» Венгрия премьер-министрі Виктор Орбан екенін ашып атамады. Бірақ оның кім екені былайынша да белгілі еді.
Украина президентінің айтуынша, Украина ЕО-ға Брюссельде күтілетін техникалық шешімдерді аяқтау мерзімін берген. Мәселе 19 наурызда Еуропа кеңесінің отырысында қаралуы тиіс. «Киев оң шешімге үміт артып отыр», деп жалғастырады агенттік.
Венгрия 20 ақпаннан бері ЕО-ның Украинаға беретін көмегінің жолын бөгеп келеді. Қарастырылып отырған несие 90 миллиард еуроны құрайды, оның 60 миллиард еуросы Украинаның қорғаныс қажеттіліктеріне арналған. Германияның сыртқы істер министрі Иоганн Вадефулдың айтуынша, Киевтің қорғаныс қабілеті ғана емес, сонымен қатар Еуропадағы бейбітшіліктің қауқары да осы несиеге байланысты болып отыр.
Венгрия өзінің ветосын Ресейдің Украина аумағы арқылы өтетін «Дружба» мұнай құбырына шабуылынан кейін Киев жөндеу жұмыстарын жүргізбегендіктен, енді өздерінің Ресейден мұнай ала алмайтынымен түсіндіреді. Өткен аптада Володимир Зеленський Будапешттің сынына жауап ретінде Ресей мұнайына Еуропа нарығында орны жоқ екенін мәлімдеген болатын.
Венгрия сыртқы істер министрі Петер Сияртоның айтуынша, Будапешт «Дружба» құбыры арқылы Венгрияға мұнай транзиті қайта басталғанға дейін» өз ұстанымын өзгертпейді-міс.
