USD
БРЮССЕЛЬ. 27 ақпан. Еуропа кеңесі ресейлік белгілі саясаткер Борис Немцовтың саяси себеппен өлтірілгеніне 11 жыл толғанын атап өтті. Бұл туралы DW ақпарына сүйенген rast.kz хабарлайды.
Еуропа кеңесі Борис Немцов «қазіргі заманғы гүлденген және демократиялы Ресей үшін күресіп, өзінің соңында маңызды саяси мұра қалдырды» деп мәлімдеді. ЕК елшілері оның өлімі орын алған жерге гүл шоқтарын қойды.
Ресейде адам құқығын қорғау жағдайы Мәскеуде ресейлік оппозиция лидерлерінің бірі – Борис Немцовтың 2015 жылғы 27 ақпанда зұлымдықпен өлтірілуінен кейінгі уақытта тек нашарлай берді.
«Оның билік жалдамалы қарақшылар қолынан қаза табуымен бірге Ресейде азаматтық қоғамға, тәуелсіз мәтбұғатқа, саяси оппозиция мен бөгде ойлы тұлғаларға қатысты репрессия күшейе түсті», – деп атап өтті Брюссельдегілер.
Өз өмірінің соңғы күндері Борис Немцов Ресейдің Украинаға қарсы бастаған басқыншылық соғысын айыптады. «Содан бері Мәскеу тарапынан агрессия тек күшейіп келеді және ол енді басып кірудің кең ауқымды сипатына ие болды. Қазір Украина тұрғындары Ресейдің жантүршіктірерлік айуандықтарын күн сайын көріп отыр», – деп атап көрсетті Еуропа сыртқы саясат қызметіндегілер.
Осы ретте Еуропа одағы 2024 жылы Ресейге адам құқығы бұзатыны үшін де санкция салған болатын. Осы шектеу режимінің шеңберінде 62 жеке тұлға мен 1 заңды тұлғаға қатысты шектеу шарасы енгізілді. Олар азаматтық қоғам мен демократиялық оппозицияға қарсы істеген қуғын-сүргіндері үшін жауыпты болып шықты.
RusNew telegram-арнасы хабарлағандай, саясаткер атып өлтірілген жерге Германия, Ұлыбритания, Франция, Чехия, Нидерланд, Литва, Польша, Латвия, Эстония, Испания және АҚШ мемлекеттерінің елшілері мен басқа елдердің дипломатиялық өкілдері келіп, гүл шоқтарын қойған.
Дипломаттар гүл дестелерін қойып жатқан шақта полиция қызметкері келіп, дауыс күшейткішпен жиналғандарды тарап кетуге шақырған.
2017 жылы шілдеде Мәскеу әскери округтік соты саясаткерді өлтірді деген айыппен Заур Дадаев, Анзор және Шадида Гуюашевтер, Темирлан Эскерханов пен Хамзат Бахаев есімді шешен азаматтарын соттады. Олар 11 жылдан 20 жылға дейінгі аралықта жаза арқалады. Бірақ бұл қылмысты ұйымдастырушылар мен тапсырыс берушілер әлі күнге дейін анықталған жоқ.
