USD
НЬЮ-ЙОРК. 22 қыркүйек. Қазақстан билігі Кремльдің ықпалынан шығып, АҚШ Үкіметімен тығыз қарым-қатынас жасасуға бейіл екенін танытты. Бұл туралы шетел мәтбұғатының ақпаратына сүйенген rast.kz хабарлайды.
Қазақстан АҚШ Үкіметімен және осы елдің іскерлік орта өкілдерімен тиімді ықпалдастық орнатуға ынталы екенін күллі әлемге білдірді.
«Қазақстан Президенті Қасым-Жомарт Тоқаев Нью-Йоркке сапары барысында АҚШ Сауда палатасының президенті және бас атқарушы директоры Сюзанн Кларкты қабылдады», – деп хабарлайды Ақорда баспасөз қызметі.
Әңгімелесу барысында екі жақты тауар айналымын ұлғайту мақсатында ұзақ мерзімді ынтымақтастықты жолға қою мәселелері талқыланды.
Қасым-Жомарт Тоқаев жуырда Қазақстанда жүргізілген жоғары деңгейдегі америкалық сауда-инвестициялық миссиясының қорытындысын құптап, еліміз Құрама Штаттардың Орталық Азиядағы негізгі серіктесі саналатынын атап өтті.
Қазақстан АҚШ Үкіметімен және іскерлік орта өкілдерімен тиімді ықпалдастық орнатуға бейіл. Осы орайда Қасым-Жомарт Тоқаев АҚШ Президенті Дональд Трамппен өткен бүгінгі әңгімелесудің, сондай-ақ Сауда министрі Говард Латникпен, бірқатар америкалық ірі компаниялар басшыларымен кездесудің мазмұнын жоғары бағалады.
АҚШ Сауда палатасының жетекшісі экономикалық байланыстарды одан әрі кеңейтудің айтарлықтай әлеуеті бар екенін растады. Қасым-Жомарт Тоқаев пен Сюзанн Кларк экономиканың түрлі секторында бірлескен жобаларды жүзеге асыру перспективасын қарастырды.
Бұдан бұрын Президент Американың бизнес өкілдерімен өткен «дөңгелек үстел» отырысында сөз сөйледі.
Тоқаев АҚШ-пен қарым-қатынасты нығайтуды сыртқы саясаттың маңызды бағыты деп атады.
Сонымен қатар Мемлекет басшысы АҚШ компанияларын еліміздің ауыл шаруашылығы әлеуетін барынша пайдалануға шақырды.
Мұның бәрі Қазақстан билігінің Кремльдің темір құрсауы мен ықпалынан құтылғысы келетін ниеті бар екенін айғақтай түседі.
