Чемпиондар лигасы: «Қайраттың» топтағы қарсыластары анықталды

МОНАКО. 28 тамыз. Бүгін Монакода тартылған Чемпиондар лигасының 2025/2026 жылғы маусымдағы негізгі тобының жеребесі қорытындысында «Қайраттың» ендігі қарсыластары белгілі болды. Бұл туралы «Советский спорт» ақпарына сүйенген rast.kz хабарлайды.

Жеребе УЕФА Чемпиондар лигасының 2025/2026 жылғы маусымдағы негізгі тобына жолдама алған 36 клубтың арасында жүргізілді. Осымен жаңартылған форматтағы турнир екінші рет өткелі отыр. Ол бұдан әрі топтарға бөлінбейтін Швейцария жүйесі бойынша ойналып, командалар біртұтас турнир кестесі аясында өзара кездесетін болады.

Турнирдің ресми күнтізбесі 30 тамыздан кешіктірілмей жарияланады.

Жалпы кезеңнің қорытындысы бойынша үздік 8 команда бірден 1/8 финалға шығады. Ал 9-дан 24-орынға дейінгі орындарды алған командалар плей-оффтағы күресін жалғастыруға құқық алу үшін түйіспе матчтарда кездеседі. Сол сияқты 25-тен 36-орынға дейін жайғасқан жасақтар Еуропа лигасына өту мүмкіндігінсіз турнирден шығып қалады.

Чемпиондар лигасының 2025/2026 жылдарғы маусымдағы финалдық ойыны 2026 жылдың 30 мамырында Будапешттегі «Пушкаш Арена» стадионында ойналады.

Чемпиондар лигасының топтық кезеңіне Алматының «Қайраты» бірінші рет шығып отыр. Ал бұдан тура 10 жыл бұрын, мұндай құқыққа қол жеткізу қазіргіден де қиын кезінде «Астана» командасы қазақстандықтар арасынан бірінші болып осы табан жолға қадам басқан еді.

Жеребенің қорытындысы бойынша «Қайрат» бұл турнирде «Реал» Мадрид (Испания), «Интер» (Италия), «Арсенал» (Англия), «Брюгге» (Бельгия), «Спортинг» (Португалия), «Олимпиакос» (Грекия), «Пафос» (Кипр), «Копенгаген» (Дания) клубтарымен күш сынасады. Соның ішінде «Реал», «Брюгге», «Олимпиакос» және «Пафос» командаларын Алматының Орталық стадионында қабылдайды. Ал қалған ұжымдармен солардың алаңдарына барып сынға түседі.

Турнирдің 1-туры ойындары 2025 жылғы 16-18 қыркүйек күндері ойналады. 2-тур 30 қыркүйек және 1 қазан күндері өтеді. Бұдан әрі турлар 21-22 қазан, 25-26 қараша, 9-10 желтоқсан, 2026 жылғы 20-21 қаңтар, 28 қаңтар күндері жалау көтереді.  Бұдан әрі плей-офф ойындарына кезек келеді.

Алматының «Қайратs» турнирдің негізгі кезеңіне шыққанына орай 18,62 млн еуро (шамамен 11,5 млрд теңге) көлемінде ақшалай табыс тауып отыр.