Ыстанбұлда Ресей мен Украина арасындағы келіссөз аяқталды
ЫСТАНБҰЛ. 24 шілде. Кеше түнде Түркияның Ыстанбұл қаласында өткен Ресей мен Украина келіссөздерінің үшінші кезеңі өзінің мәресіне жетті. Бұл туралы DW ақпарына сүйенген rast.kz хабарлайды.
Келіссөз екі ел делегациялапрының басшылары Владимир Мединский мен Рустем Умеровтің кездесуінен басталды. Бұдан кейін командалар кеңейтілген құрамда келіссөздер жүргізді.
Шілденің 23-і, сәрсенбі күні кешке қарай Ыстанбұлда Ресей мен Украина арасындағы келіссөздер аяқталды.
Бастапқыда кездесудің Бешикташ ауданындағы Чыраған сарайында оңаша форматта өткені хабарланған болатын. Алайда кейін «РБК-Украина» басылымының мәнбесі делегация басшылары Түркия сыртқы істер министрі Хакан Фиданның қатысуымен «қысқа дайындық кездесуін» өткізгенін жариялады.
Мединский мен Умеровтің кездесуінен кейін кеңейтілген құрамдағы келіссөздердің үшінші раунды басталды. Олардың алдында Түркия сыртқы істер министрі құттықтау сөз сөйледі. «Біз келіссөздердің алғашқы екі раундында айтарлықтай нәтижелерге қол жеткіздік. <…> Біз сондай-ақ келіссөздердің екінші раунды барысында тараптардың атысты тоқтату туралы көзқарастарын көрсететін меморандумдармен алмасуын маңызды оқиға деп санаймыз», – деді ол.
Фидан келіссөз жүргізетін топтардың Ыстанбұлдағы кездесулер арасында «техникалық деңгейде» байланыстарды сақтағанын айтты. Ол келіссөздердің басты мақсатын «бейбітшілікке жол ашатын атысты тоқтату» деп атады. Фиданның айтуынша, Түркияда атысты тоқтату келісімінің сақталуын бақылау үшін қажетті инфрақұрылым бар.
Хакан Фиданның кіріспе сөзінен кейін жергілікті телеарналар келіссөз өтіп жатқан бөлмеден хабар таратуды тоқтатты. Кездесу бұдан әрі жабық есік жағдайында өтті.
Келіссөз бір сағатқа жуық уақытқа созылды, тараптар жаңа алмасулар мен Путиннің Зеленськиймен кездесуі мәселелерін талқылады
Толық келіссөздің басталуы мен аяқталуы туралы хабарландырулардың арасында шамамен 40 минут өтті. ТАСС ақпарат мәнбесіне сілтеме жасап жазғандай, үшінші турды жалғастыру жоспарда болған жоқ. Ресей агенттігінің хабарлауынша, тараптар әскери және азаматтық қызметкерлерді алмасуға мәміле жасасты. ТАСС сонымен қатар Ресей мен Украина арасындағы келіссөздердің төртінші раунды туралы шешім жаңа келісімдер жүзеге асырылғаннан кейін қабылданатынын хабарлады.
Украина делегациясының басшысы Рүстем Умеров өз тарапы мемлекет басшылары Володимир Зеленський мен Владимир Путиннің кездесуін тамыз айының соңына дейін өткізуді ұсынғанын айтты. Ол Киевтің қазірдің өзінде атысты тоқтатуға дайын екенін және Мәскеуді конструктивті көзқарас танытуға шақырғанын мәлімдеді.
Ресей делегациясының басшысы Владимир Мединскийдің айтуынша, қазір Ресей мен Украина екі жақтан 250 адамнан әскери тұтқындарды алмасуды аяқтағалы тұр. Ол Ресейдің Украинада жүрген Курск облысының тұрғындарына украиналық әскери қызметкерлермен және басқа санаттағы адамдармен айырбастауға дайын екенін атап өтті.
Келіссөз барысында Ресей Украинаға тағы 3 мың украин әскери қызметкерінің денелерін беруді ұсынды. Ресей делегациясының басшысы Киев Мәскеудің онлайн режимде жұмыс істейтін әскери, саяси және гуманитарлық үш келіссөз тобын құру туралы ұсынысын қарастыруға уәде бергенін айтты.
Мәскеу Киевке жараланғандар мен қаза тапқандарды жинау үшін майданда қысқа мерзімді атысты тоқтату мүмкіндігін қарастыруды ұсынды.
Мединский Ресей мен Украинаның меморандумдардағы ұстанымдары бір-бірінен алыс екенін айтты. Оның айтуынша, ел президенттері кездеспес бұрын бітімгершілік келісімді талқылау қажет. «Путин мен Зеленськийдің кездесуі оның өтуі үшін жақсы жоспарланған болуы керек», деді ол.
