USD
МӘСКЕУ. 16 маусым. АҚШ Ресеймен арадағы қарым-қатынасты бұрынғы қалпына келтіру жөнінде келіссөзді жалғастырудың қажеті жоқ деп шешті. Бұл туралы DW ақпарына сүйенген rast.kz хабарлайды.
Ресей сыртқы істер министрлігінің ресми өкілі Мария Захарова дүйсенбі күні Мәскеу таяуда жариялаған Ресей мен АҚШ арасындағы екіжақты қарым-қатынасты қалыпқа келтіру жөніндегі келіссөздердің келесі раунды өтпейтінін мәлімдеді.
«Уашингтон бір-бірінен өзара «тыжырынушылықтарды» жою және дипломатиялық миссиялар жұмысын қалыпқа келтіру мәселелерін талқылау үшін жоспарланған консультациялардан бас тартты», – деді Захарова.
«Олар алған үзіліс тым ұзақ болмайды деп үміттенеміз», – деп атап өтті ол.
Дональд Трамп әкімшілігі билікке келгеннен бері Ресей мен Америка өкілдері кем дегенде алты рет бетпе-бет кездескен. Оның біріншісі 18 ақпанда Эр-Риядта, екіншісі 27 ақпанда Ыстанбұлда өтті. Бір айдан кейін, 24 наурызда екі елдің делегациялары Сауд Арабиясының астанасында қайта кездесті.
Сәуір айының басында Ресейдің тікелей инвестиция қорының басшысы Кирилл Дмитриев келіссөздер жүргізу үшін Уашингтонға ұшып барса, бір аптадан кейін Санкт-Петербургке Трамптың арнайы өкілі Стивен Уиткофф келді және бір мезгілде дерлік, яғни 10 сәуірде Ыстанбұлда ресейлік және американдық дипломаттар қайтадан кездесті.
Өткен аптада Ресейдің АҚШ-тағы жаңа елшісі Александр Дарчиев консультациялардың жаңа раунды «таяу күндері Мәскеуде» өтетінін айтты. Ресей сыртқы істер министрлігі Уашингтонның келіссөздерден бас тартуының себебін нақтылаған жоқ.
Тікелей Ресей-АҚШ қарым-қатынастарына арналған келіссөздердің екі раунды (10 және 27 сәуір) іс жүзінде нәтижесіз аяқталды: олар Уашингтонға жаңа елші тағайындау және дипломатиялық өкілдіктер үшін банк қызметтерін бұғаттау туралы келісімге келді.
Басқа да маңызды мәселелер бойынша, «біз әлі ілгерілеуге қол жеткізе алмадық», – деп мойындады сыртқы істер министрінің орынбасары Сергей Рябков 9 маусымда ТАСС агенттігіне берген сұхбатында. Атап айтқанда, АҚШ ресейлік дипломаттардың бұл елде еркін жүріп-тұруына тыйым салуды алып тастаудан (оларға дипломатиялық миссиялары айналасындағы 25 мильдік аумақөа дейін ғана барып тұруға рұқсат етілген), сондай-ақ кезінде Барак Обаманың әкімшілігі тәркілеп алып қойған дипломатиялық мүліктерді қайтарып беруден бас тартқан.
