USD
АСТАНА. 30 мамыр. Қазақстандық грек-рим күресінің шебері Диас Қален допинг дауынан кейін Азияның 2023 жылғы чемпионы атағына қол жеткізді. Бұл туралы sportarena.kz ақпарына сүйенген rast.kz хабарлайды.
Астанада өтіп жатқан Қазақстан Кубогы турнирі кезінде маңызды оқиға орын алды. Жарыстың іріктеу кезеңіне қатысушы, жетісулық грек-рим күресінің өкілі Диас Қален республика федерациясының президенті Дәулет Тұрлыхановтың қолынан Азияның 2023 жылы өткен чемпионатының 82 келіге дейінгі салмағындағы алтын медалін алды. Бұған дейін бұл чемпиондық атақ пен алтын медаль қырғыз Акылбек Талантбековке тиесілі болып келген. Алайда Астана финалында біздің жерлесіміздің жолын байлаған ол допинг салдарынан төрт жылға спорттан шеттетіліп, аталмыш атақтарынан айырылып қалды. Сөйтіп, финалда одан жеңілген Диас Қален алтын медальге қол жеткізді.
Допинг қолдану арқылы жеңіске жеткен қырғыз палуанынан атақтың алынып қалғанын спорт жанкүйерлері «әділдіктің салтанат құруы» ретінде бағалап жатыр.
Айта кету керек, қазіргі күндері Астанада өтіп жатқан Қазақстан Кубогы жарысына Диас та келген еді. Турнирде 87 келіге дейінгі салмақта кілемге шыққан ол өзінің бірінші белдесуінде сайыстың басты үміткерінен ұтылып қалды.
Диас Қален 1997 жылы 30 қарашада Жетісу облысында туған. Ол – Азия чемпионатының 2022 жылғы күміс жүлдегері, 2023 жылғы Азия чемпионы. Екеуінде де 82 келіге дейінгі салмақта өнер көрсетті. 2022 жылы 82 келіге дейінгі салмақта Исламиадаға қатысып, 7 орын алды. Қазақстан Республикасының спорт шебері, Қазақстан Республикасының халықаралық дәрежедегі спорт шебері.
