USD
БЕРЛИН. 28 наурыз. Германия Ресей диктаторы Владимир Путиннің Украинада өтпелі үкімет құру жайлы ұсынысын қабылдамады. Бұл туралы DW ақпарына сүйенген rast.kz хабарлайды.
Германия үкіметінің ресми өкілі Штеффен Хебестрейт 28 наурыз, жұма күні РФ диктаторы Владимир Путиннің Украинада уақытша үкімет құру керектігі жөніндегі ұсынысына үзілді-кесілді қарсы жауап қайтарды.
Оның айтуынша, Кремль Украина лидері Володимир Зеленський заңсыз президент дегенді бірнеше рет мәлімдеді, бірақ «Путин Украинаға күнделікті шабуыл жасау арқылы мақсаты бұл елдің демократиясына баға беру емес екенін дәлелдеп отыр». Хебестрейт Зеленськийдің «Украинаның заңды президенті екенін және украиндардың атынан келіссөз жүргізіп жүрген басқа ешкім емес, соның өзі екенін» атап өтті.
Еурокомиссия Путиннің мәлімдемелері жай насихат екенін айтып, оған түсініктеме беруден бас тартты. «Біз фактілерді мұқият зерттеп жатырмыз, бұл жерде агрессор да бар және бейбітшілікке деген ерекше ізгі ниетін көрсетіп отырған Украина да бар», – деді журналистермен өткен брифингте ЕК өкілі Анита Хиппер. «Тап сондықтан біз Украинаны қолдаймыз, сосын ұзақ, әділ және берік ұзақ бейбітшілікті қамтамасыз етуге жұмыламыз», – деді ол.
«Путин – қылмыскер, ол соғыстағы қылмыстары үшін іздестілуде, оның сөзінде ешқандай құн жоқ», – деді Хиппер.
Reuters агенттігінің баяндауынша, «Ақ үйдегілер Путиннің есіне Украина үкіметін тек оның халқы сайлайтынын, демек, уақытша үкімет жөнінде ешқандай да сөз болуы мүмкін еместігін айтқан».
Ал Еуропа одағы Путин келіссөз процесін кейінге қалдыра беру үшін осындай әңгімелерді әдейі шығарып, Трампты мұрнынан сүйреп жүр дегенді айтты.
