USD
БЕРЛИН. 13 наурыз. Алмания сыртқы істер министрі Анналена Бербок Батыс елдерін Трамптың қысымына қарсылық көрсетуде бірлікте болуға шақырды. Бұл туралы DW ақпарына сүйенген rast.kz хабарлайды.
Ол Еуропа елдерін Ресей басқыншылығынан өзін қорғап жатқан Украинаға, Трамп әкімшілігінің жаппай қысымына қарамастан, Ресей мен оның президенті Владимир Путинге қатысты біртұтас ұстанымда болуға шақырды.
«Бейбітшілікке апаратын жол күш пен бірлік арқылы ғана жасалады», – деді ол 12 наурыз, сәрсенгбі күні Канададағы G7 сыртқы істер министрлерінің кездесуіне ұшар алдында.
Бербок G7-дегі ынтымақтастық осы уақытқа дейін тұрақтылық пен қауіпсіздікке қол жеткізуге бағытталғанын, мұнда еуропалықтардың өзара күшті және сенімді серіктес болып қала беретінін атап өтті. «Еуропа елдері болашақта қауіпсіздік пен қорғаныс саласына көбірек күш салады», – деп уәде берді ол.
Бейбітшілікті қаламайтын және тек күштілердің құқығына сенетіндер «бірлігіміз бен ережелерге негізделген тәртіпті қалай сақтай алатынымызды мұқият қадағалап отыр», дегенді қосты сосын алман министрі.
Алмания (Германия) сыртқы істер министрі сондай-ақ G7 елдері халықаралық аренада маңызды рөл атқаратынына сенім білдірді, олардың «ортақ компасы» «ортақ мүдделер» болып табылады. «Бізде әртүрлі пікірлер болуы мүмкін. Бірақ, ең бастысы, қазіргі заманның негізгі қауіпсіздік сұрақтарына жауап таба алатындығымыз», – деп түсіндірді ол.
Бұған дейін АҚШ-тың Канададағы G7 сыртқы істер министрлерінің кездесуінде Ресейге қарсы «дұшпандық» риториканың болмауын талап етіп отырғаны аян болған. «Бұл ретте Украинадағы соғысты реттеуде нақты қандай да бір тарапты қолдау керектігі туралы сөз жоқ,» деді АҚШ мемлекеттік хатшысы Марко Рубио.
Өз кезегінде Bloomberg агенттігі G7 бірлескен мәлімдемесінің жобасы бойынша келіссөздер барысында АҚШ Ресей Федерациясына қатысты ережелерді жұмсартуды талап етіп отырғанын жазды. Атап айтқанда, Уашингтон «санкциялар» деген сөзді алып тастауды, ал «Ресейдің Украинаға қарсы соғыс жүргізу қабілеті» деген сөзді «табыс табу» деген сөзбен алмастыруды талап етті. Сонымен қатар, негізгі коммюнике жобасынан ресейлік агрессия туралы кез келген ескерту алынып тасталды. Оның орнына мәтін «атысты тоқтату туралы келісімге қол жеткізу» үшін «барлық күш-жігерді» құптайды» болып қолданылады», деп жазады Bloomberg.
«Үлкен жетілік» елдерінің сыртқы істер министрлері арасындағы келіссөздер 12-14 наурыз аралығында Шарлевуада (Квебек, Канада) өтеді.
