Дзюдошы Әбиба Әбужақынова Гран при турнирінде чемпион атанды
ЛИНЦ. 8 наурыз. Аустрияның Линц қаласында өтіп жатқан дзюдодан әлемдік Гран при тіурнирінде қазақстандық Әбиба Әбужақынова алтын медаль жеңіп алды. Бұл туралы 1bol ақпарына сүйенген rast.kz хабарлайды.
Жерлесіміз 19 жасар жапон атлетін Сачио Ёшиноны айқын басымдықпен ұтты. Есеп – 10:1!
Әбиба осымен екінші мәрте Гран при турнирінде алтыннан алқа тағып отыр. Ол бұған дейін 2023 жылы Португалия өткен Гран при жарысында топ жарып еді.
Әбиба Линц турнирінде сайысқа екінші айналымнан қосылды. Ол бірінші белдесуінде жапон Мизука Хараданы иппонмен жеңді. Ширек финалда аустриялық Жаклин Спрингерден шидо санымен басым түсті. Жартылай финалда нидерландтық Амбер Херсьеспен белдесуінде вазаримен жеңіске жетті. Енді, міне, финалда жапон қызы Сачио Ёшинодан айласын асырып, жеңімпаз атанды.
Еске сала кетейік, Әбибаның өзінің биылғы алғашқы жарысын осылай зор табыспен атап өтті. Ол соңғы рет 2024 жылы Абу Дабиде өткен Гран Слэм турнирінде қола медаль алған болатын.
Турнирге Қазақстаннын 5 дзюдошы барған. Бірақ Әбибадан басқалары түгел жарыс жолынан ерте шығып қалды. Атап айтқанда, Толғанай Әбеуова (52 келі), Дана Әбдірова (57 келі) алғашқы белдесулерінде-ақ ұтылды. Толғанай серб Милиса Николичтен аса алмаса, Дана хорват Дора Бортасқа есе беріп қойды. Ал 60 келіде Талғат Орынбасар әуелі швейцариялық Дэвид Гоштанды жеңгенімен, келесі сайысында бразилиялық Аугусто Михаелден тоқтады. Сол сияқты 66 келіде өнер көрсеткен Нұрмұхамет Ботабай алдымен неміс дзюдосы Ноэль Шмидтен басым түскенімен, екінші айналымда өзбек Дильшодбек Баратовтан пәті қайтты.
Турнир 9 наурызда мәреге жетеді.
