Швейцария Гулнара Каримованың 182 млн долларын қайтарады
БЕРН. 7 ақпан. Швейцария экс-президенттің қызы Гулнара Каримованың активтерінен Өзбекстанға тағы 182 миллион доллар қайтаратын болды. Бұл туралы Kun.uz ақпарына сүйенген rast.kz хабарлайды.
Өзбекстан үкіметі мен Швейцария федералдық кеңесі арасындағы келісімге сәйкес, Швейцария бас прокуратурасы Гулнара Каримоваға қарсы қозғалған қылмыстық іс бойынша тәркіленген 182 миллион доллар қаржыны Өзбекстанға қайтармақшы. Қаражат БҰҰ-ның көп донорлы трастық қоры арқылы беріледі.
6 ақпанда Ташкентте Өзбекстанның әділет министрі Акбар Ташкулов пен Швейцарияның Өзбекстандағы елшісі Константин Оболенский «Тәркіленген активтерді бөлу туралы келісімге» қол қойды.
Келісімге сәйкес, Өзбекстанның бірқатар азаматтары заңсыз иемденген, 2012 жылы Гулнара Каримоваға қатысты қылмыстық істің аясында толығымен тәркіленген 182 миллион доллар елге қайтарылатын болды.
Қаражат БҰҰ-ның «Uzbekistan Vision 2030 Fondi» көп донорлы траст қоры арқылы аударылады.
2022 жылдың 16 тамызында Берн қаласында Өзбекстан мен Швейцария арасында Өзбекстан халқының мүддесі үшін заңсыз алынған активтерді қайтару тетігі туралы келісімге қол қойылды. Ол «Uzbekistan Vision 2030 Fondi» қорын қаражатты қайтару үшін пайдалануды көздейді, сондай-ақ оларды бөлудің негізгі принциптері мен мақсаттарын анықтайды.
Осы іс-шаралар аясында 2022 жылдың тамызында қол қойылған бірінші келісім 131 миллион долларды қайтаруды қарастырған. Жаңа келісімге қол қойылғаннан кейін қайтарылған қаражаттың жалпы сомасы 313 миллион долларға жетеді.
Қор арқылы қайтарылған қаражат денсаулық сақтау және білім беру салаларындағы әлеуметтік маңызы бар жобаларға бағытталады. Қор және оның жобалары туралы ақпарат қордың ресми сайтында өзбек және ағылшын тілдерінде берілген.
