USD
МӘСКЕУ. 6 ақпан. Ресейдің Украина жерінде соғысып жатқан әскерлері майдан шебіне оқ-дәрілерді есекпен жеткізіп жатқаны белгілі болды. Бұл туралы The Moscow News ақпарына сүйенген rast.kz хабарлайды.
Ресейдің Украинадағы оккупациялық армиясы күтпеген жерден көлік құралдарының өткір тапшылығына тап болып жатыр. Бұған дейін жай автокөліктер мен самокаттарды снарядтар тасуға пайдаланып келген басқыншылар енді есектер мен аттарды осы жұмыстарға жеге бастады. «Қазір біздің армия оқ-дәрілер тасымалдау үшін жануарлар көмегіне де жүгініп жатыр», – деп жазды Ресейдің соғысқұмар Z «әскери тілшілері».
Мәселен, «Кирилл Фёдоров / Война История Оружие» телеграм-каналы РФ қорғаныс министрлігі осындағы әскери бөлімшелердің біріне тасымалға керекті жаңа «кіре көлігі» ретінде арнайы жіберген жануарлар жайлы жазды. «Жауынгерлерге «алдыңғы шепке» оқ-дәрілердір жеткізіп беретін арбаның міндетін атқаратын есектер жіберілді. Ал сендер мұны керек етпейсіңдер ме? Автокөлік деген енді қатты қардар болып тұр. Тапшылық соған мәжбүрлеп жатыр ғой», – деп өз ренішін білдірді Z-блогер.
Хабарланғандай, қорғаныс министрлігінің бұйрығына сәйкес, техникалар мен көліктердің тізіміне жануарлар, соның ішінде есектер де тасымал құралы ретінде енгізілген, сондықтан бұдан былай олар да сол жұмыстарға жегіледі.
«Ресей әскерилері жұртты таң қалдырған үстіне таңғалдыруды жалғастырып жатыр. Командалық басшылық бөлімшенің логистикалық мүмкіндігін есек пен ат түріндегі кіре көліктері есебінен арттыра түсуде», – деп жазды әскери сарапшы Ян Матеев. Ол сосын бұған мұның сирек кездесетін нәрсе екенін айта отырып, «енді жарты жылдан кейін не боларын кім білсін» дегенді қосты.
Бұған дейін Forbes ресейлік жауынгерлердің майданда атты пайдаланып жүргендері жайлы хабарлаған болатын. Журналистер әлеуметтік желілерде пайда болған видеоға сілтеме жасап, екі ресейлік сарбаздың далада атқа мініп бара жатқанын көрсетті.
