USD
АСТАНА. 27 қаңтар. Футболдан Қазақстан ұлттық құрамасының бас жаттықтырушысы Станислав Черчесов өз еркімен қызметін аяқтады. Бұл туралы Қазақстан Футбол федерациясының ақпарына сүйенген rast.kz хабарлайды.
Осымен бірге Қазақстан құрамасының жаттықтырушылар штабы толық құрамымен доғарысқа кетті.
Қазақстан Футбол федерациясы Станислав Саламович Черчесов пен оның штабына атқарған жұмысы үшін алғыс айтып, алдағы мансабына табыс тіледі.
Қазір Футбол федерациясы Қазақстан құрама командасының бас жаттықтырушысы лауазымына үміткерлер тізімі түзіп жатыр.
Еске сала кетейік, Станислав Черчесов Қазақстан құрамасының тізгінін 2024 жылдың маусым айында ұстады. Ұлттық құрама оның басшылығымен УЕФА Ұлттар лигасында 6 матч өткізді. Бұлардың 1 ойында тең ойнап, қалған 5 кездесуде түгел ұтылды. Атап айтқанда, 6 қыркүйекте өз алаңында Норвегия құрамасымен 0:0 есебімен тең ойнаса, 9 қыркүйекте сырт алаңда Словениядан – 0:3, 10 қазанда Австриядан – 0:4, 13 қазанда өз алаңында Словениядан – 0:1, 14 қарашада Австриядан – 0:2, ал 17 қарашада сырт алаңда Норвегиядан 0:5 есептерімен ұтылды. Сөйтіп, команда 6 ойында бір гол да соға алмай, өз қақпасына 15 доп жіберіп қойды.
