USD
ТЕЛЬ-АВИВ. 26 қаңтар. Тель-Авив Израиль қорғаныс армиясы (ЦАХАЛ) тартып алған ресейлік қару-жарақтарды Украинаға жөнелте бастайды. Бұл туралы The Moscow News ақпарына сүйенген rast.kz хабарлайды.
Әңгіме Таяу Шығыстағы әскери операциялар кезінде Израиль қорғаныс армиясы басып алған ресейлік қару-жарақтар жайында болып отыр. Ондай қарулар мұндағы террорлық ұйымдар арсеналында өте көп. Мұның жайын Еуропадағы және әлемнің басқа аймақтарындағы әскери қақтығыстарды талдауға маманданған OSINTdefender мониторинг орталығы жеткізді.
Орталықтың мәліметінше, АҚШ-тың әскери-әуе күштеріне тиесілі америкалық бірнеше С-17 әскери-көлік ұшағы Германиядан Израильге, одан кейін Польшаның Жешов қаласына ұшып барған. Бұл қала АҚШ пен НАТО елдерінің Украинаға әскери көмек көрсететін негізгі логистикалық орталығы болып табылады.
Әзірге аталмыш ұшақтардың нақты нені тасымалдап апарғандары белгісіз. Алайда Израиль бұған дейін Таяу Шығыста қолға түскен ресейлік қаруларды Украинаға беру мүмкіндігін қарастырып жатқанын мәлімдеген. Бұлардың арасында танктер, танкке қарсы басқарылатын зымырандар және оқ-дәрілер болулары мүмкін. Оның қатарында сондай-ақ Тель-Авив Киевке беруді жоспарластырып отырған Patriot зенит-ракета кешені де болса керек.
2024 жылдың күзінде Израиль әскерилері Ливанның оңтүстігінен «Хезболла» содырлар тобының жерасты базасын тапты. Нысан «Радван» элиталық бөлімшесінің басқару орталығы және әртүрлі қарулардың қоймасы ретінде қызмет еткен. Олардың арасынан зымырандар, миномет снарядтары, Калашников автоматтары, оқ-дәрілер, бронды жилеттер мен басқа да көптеген нәрселер табылды.
Ал 2025 жылғы 21 қаңтарда Украинаның Израильдегі елшілігі Тель-Авивтің ЦАХАЛ басып алған қаруларды Киевке беруді ұсынып отырғанын хабарлады. Украина тарапы мұны өте маңызды қадам деп есептеп, мәселенің оңды шешілетініне үміт артатын жеткізді. Елшілік өз мәлімдемесінде бұл бастама Израильдің Киев пен Тель-Авив алдында тұрған ортақ қатерді түсінгендігін көрсететінін атап өтті.
