USD
ШАМ. 19 қаңтар. Сирияның қаржы министрлігі Ресей, Иран және Израильден тауар әкелуге тыйым салды. Бұл туралы The Moscow News ақпарына сүйенген rast.kz хабарлайды.
Al Araby басылымының жазуынша, атап өтілген елдерден әкелінген өнімдер тәркіленеді. Сонымен қатар, Сирия Араб Республикасында ұзақ жылдардан бері Израиль тауарларының импортына эмбарго қолданылып келеді. Газет президент Башар Асад тақтан тайдырылғаннан кейін Сирияға импорт тауарлар келе бастағанын баяндайды. Оның соңғы кездері елде Түркияның бөтелкедегі суы, Саудияның азық-түлік өнімдері, Американың Twix және Snickers шоколадтары, Pepsi сусындары пайда болған.
Осының аясында жаңа билік қаржылық есеп айырысуларды доллармен жүргізуге рұқсат берді, бірыңғай кедендік баждарды бекітіп, оларды 50-60%-ға төмендетті. Атап өтілгендей, бұл шикізат импортын жеңілдету арқылы отандық тауар өндірушілерді қолдау үшін жасалып отыр, осының өзі жергілікті өнеркәсіпті ынталандырады. Шешім Иран мен Израиль азаматтарының Сирияға кіруіне тыйым салынғаннан кейін қабылданды. Шара әзірге ресейліктерге қатысты емес.
«Осымен бір мезгілде Ресей жаңа үкіметтің көзқарасы анықталғанша Сирияға бидай жеткізуді тоқтатты», – деп хабарлады Reuters. Мұны растаған РБК жағдайдың бұлай қалыптасуын қазір республикада «өзара әрекеттесетін ешкімнің жоқтығымен» түсіндірді. Өз кезегінде Сирияның жаңа билігі Ресейге Тартус портында орналасқан жалғыз шетелдік базасынан қару-жарақ пен әскери техниканы әкетуге әлі рұқсат бермей отыр. Орыс кемелері екі аптаға жуық уақыттан бері мұнда келе алмай, жақын жердегі айдында жүзіп жүр.
