Талғар ауданының полиция басқармасына жаңа басшы келді
ҚОНАЕВ. 15 қаңтар. Ішкі істер министрінің бұйрығымен Алматы облысы Талғар аудандық полиция басқармасына жаңа бастық тағайындалды. Бұл туралы Inform.lz ақпарына сүйенген rast.kz хабарлайды.
Талғар аудандық полиция басқармасын енді полиция полковнигі Асхат Бекенов басқарады.
Асхат Барлыбайұлы Бекенов 1980 жылы Павлодар облысы Ертіс ауданында туған. 2001 жылы Қарағанды заң институтын бітірген. Ішкі істер органдарында 1997 жылдың тамызынан бастап қызмет етеді. Мансабын Павлодар облысы Қашыр аудандық ішкі істер басқармасында жедел уәкіл қызметінен бастаған.
Жаңа лауазымға тағайындалғанға дейін Алматы қаласы полиция департаменті криминалдық полиция басқармасы бастығының орынбасары болып жұмыс істеді.
Бұған дейін, 2024 жылдың желтоқсанында Талғар аудандық полиция басқармасының бастығының міндетін атқарушы қызметін Айдар Омаров атқарған болатын.
Еске сала кетейік, Талғар қаласында 2024 жылы 4 қазанға қараған түні 16 жасар Шерзат Полат бір топ қарақшының қолынан қаза тауып, тағы екі адам ауыр жарақат алғаннан кейін Алматы облысының полициясында бірқатар кадрлық ауыс-түйістер орын алған еді. Осылайша, Ішкі істер министрінің бұйрығымен полиция департаменті бастығының бірінші орынбасары Серік Шалқаров, Талғар ауданы полициясы басқармасының бастығы Нұржан Күнтүнов, полиция департаменті экстремизмге қарсы іс-қимыл басқармасының бастығы Ұлан Байтақов, полиция департаменті криминалды полиция басқармасының бастығы Руслан Смағұлов, полиция департаменті ұйымдасқан қылмыспен күрес басқармасының бастығы Дулт Қайыр және оның орынбасары Жанат Омаров қызметтерінен босатылған болатын.
Кейінірек жергілікті полиция қызметі басқармасының бастығы лауазымына Абдунур Тасыбаев, ұйымдасқан қылмысқа қарсы күрес басқармасының бастығына Байжан Сатылғанов тағайындалды.
Бұдан бөлек, министрдің бұйрығымен подполковник Ақылбек Төлеуов пен полковник Нұржан Байқұлов Алматы облысы полиция департаменті бастығының орынбасарлары болып тағайындалды.
Ал қазан айында Мейрам Әбікеев Алматы облысы полиция департаментінің бастығы болды.
