USD
МӘСКЕУ. 17 желтоқсан. Ресей қорғаныс министрі Андрей Белоусов армияны НАТО-мен соғысуға дайындауға пәрмен берді,. Бұл туралы The Moscow News ақпарына сүйенген rast.kz хабарлайды.
Кремльдегілер Альянстың Еуропадағы әскерлері санының артып келе жатқанынан қорқа бастаған сияқты.
«Ресей «алдағы жақын онжылдықтар көлемінде» Еуропада НАТО-мен орын алуы ықтимал соғыс қақтығысына дайын болуға тиіс», – деді РФ қорғаныс министрі. Оның айтуынша, әскери блоктың соңғы шешімдері Солтүстік альянспен болуы ықтимал текетірестің ерте ме, кеш пе, күн тәртібіне ене салуы қиын емес. «Сондай-ақ бұл АҚШ пен НАТО-ның басқа елдерінің доктриналық құжаттарында көрініс тапқан», – деді Белоусов.
Мұның алдында әскерилер алдында президент Владимир Путин де сөз сөйлеп, НАТО елдерінің әскери шығындарын еселеп арттырып жатқандарын, ал Еуропадағы АҚШ солдаттары санының 100 мыңнан асып жығылғанын айтқан болатын. «Альянс әскерлерінің топтары Ресей шекарасы маңына шоғырласып жатыр», – деді ол.
РФ диктаторының айтуынша, НАТО баяғыда-ақ альянстың «тарихи жауапкершілік аймағынан» шығып кеткен. Альянс шығыс қаптал деп аталатын аумақтан бөлек, Азия-Тынық мұхиты өңіріне де кіріп алған. АҚШ-тың айтақтауымен ондаған жылдар бойы қалыптасқан қауіпсіздік архитектурасын бүлдіретін жаңа әскери одақтар құрылуда», – деді Путин.
Кремльдің қожайыны сондай-ақ АҚШ-тың 5500 шақырымға дейін баратын ракеталар жасап, алдыңғы қатарлы аймақтарға орналастырмақ болып жатқанын атап өтті. «Біз мұның біздің арамызды ажыратып, кең ауқымды ауыр зардаптарға алып баратынын талай рет ескерттік», – деді ол. Бұған сосын Уашингтон осы бағытынан қайтпаса, Ресейдің өз мойнынан жауапкершілікті алып тастайтынын мәлімдеді.
