USD
АҚТӨБЕ. 16 наурыз. Ақтөбе облысының әкімі Оңдасын Оразалиннің өкімімен Асхат Шахаров Ақтөбе қаласының әкімі болып тағайындалды. Бұл туралы Kapital.kz хабарлады.
«Ақтөбе облысының әкімі Оңдасын Оразалиннің өкімімен, Президент әкімшілігінің және облыстық мәслихаттың келісімі бойынша Асхат Шахаров қаланың әкімі болып тағайындалды», делінген хабарламада.
Асхат Шахаров – дзюдо мен самбодан Қазақстанның еңбек сіңірген спорт шебері, дзюдодан әлемнің қола жүлдегері (2001), Азияның күміс жүлдегері (2000), самбодан әлемнің үш дүркін чемпионы (2000, 2004, 2005), екі сапар қола жүлдегері (1998, 2002), әлемнің жастар арасындағы екі мәрте чемпионы (1997, 1998). Бұдан бөлек, Әлем кубогының екі рет иегері.
Асхат Берлешұлы Шахаров 1978 жылы 3 қазанда РСФСР-дің Орынбор облысындағы Ақбұлақ ауылында туған. Кейін Ақтөбе облысындағы Новый кентіне көшіп келген.
1999 жылы Қазақ мемлекеттік туризм және спорт академиясын дене шынықтыру пәнінің оқытушысы – спорт бойынша жаттықтырушы, 2002 жылы Т.Рысқұлов атындағы Қазақ экономикалық университетін халықаралық экономист мамандығы бойынша бітірген. 2013 жылы РФ Президенті жанындағы Ресей Мемлекеттік қызмет және халық шаруашылығы академиясын тәмамдаған.
Экономика ғылымдарының кандидаты.
Атақты спортшы еңбек жолын 2000 жылы Қ.Жұбанов атындағы Ақтөбе мемлекеттік университетінде спорт пәндері кафедрасының аға оқытушысы болып бастады.
2005 жылдың қараша айынан Ақтөбе педагогикалық институты дене тәрбиесі кафедрасының доценті.
2007 жылдың сәуір айынан Ақтөбе облыстық олимпиадашылар резервін дайындау орталығының директоры.
2013 жылдың маусымынан Батыс Қазақстан облысы Қаратөбе ауданының әкімі, 2017 жылдың шілде айынан күні бүгінге дейін Батыс Қазақстан облысы Зеленов ауданының әкімі болды.
