Ердоған соғыс әділ аяқталуы үшін Украинаға Қырымды қайтаруды ұсынды
АНКАРА. 11 қыркүйек. Түркия президенті Украинадағы соғыс «әділдікпен» аяқталуы үщін Қырым түбегін оған қайтарып беруді талап етті. Бұл туралы The Moscow News ақпарына сүйенген rast.kz хабарлайды.
«Украинадағы соғыс «әділ» бейбітшілікпен аяқталуы тиіс, оның шеңберінде Киев өзінен Ресей аннексиялап алған Қырымды қайтарып алуы тиіс», – деп мәлімдеді Түркия президенті Реджеп Тайип Ердроған.
«Біз соғыстың әділдікпен және Украинаның егемендігі мен тәуелсіздігі, территориялық тұтастығы негізіндегі берік бейбітшілікпен аяқталатынына шын көңілден сенеміз», – деді түрік лидері бүгін Киевте ашылған Қырым платформасы саммитіне қатысушыларға арнаған видео үндеуінде.
Түркия президенті сонымен қатар, «Қырымды Украина құрамына қайтару – халықаралық құқықтың талабы» екенін атап өтті. Оның айтуынша, Ресей бұл түбекті Украинаға кең ауқымды шабуылмен басып кіргенге дейін сегіз жыл бұрын, 2014 жылы аннексиялап алған болатын. Ал Түркия Қырымның Ресейге қосылғанын ешқашан мойындаған емес және оны заңсыз әрекет деп санайды.
