Ресей полицейлері орманға тастап кеткен өзбек азаматы аңдарға жем болды
МӘСКЕУ. 10 қыркүйек. Мәскеу облысында екі полицей орманға тастап кеткен өзбек мигрантын аңдардың жеп кеткені жайлы ақпар тарады. Бұл туралы Podrobno.uz дерегіне жүгінген rast.kz хабарлайды.
Осыған байланысты қазір Ресейде үлкен жанжал көтеріліп жатыр. Оқыс оқиғаның орын алуына себепкер болған екі полицей де қызметтерінен кетіріліп, қамауға алынды.
«Ресейде ұсталған Өзбекстан аазаматын орманда өлуге қалдырып кеткен полиция қызметкерлері қамалды», – делінген хабардамада.
Жағдайдың асқынғаны сондай, мәселеге РФ мемлекеттік думасының депутаттары да араласты. Мәселен, бұдан аздаған уақыт бұрын Қазақстанға қайта-қайта соқтығуымен есте қалған Евгений Федоров осы жолы өзінің өзбек мигранттының тағдырына қатты қайғыратынын білдіріп, жауапсыз тәртіп сақшыларын «сойып» салған. Делқұлы депутат өз полицейлерін «үңгірдегі ұлтшылдар» деп айыптап, оларға қара аспанды төндіріп қойды (Тура біздің Дәурен Абаев сияқты! Айтқандай, ол қазір Қазақстанның Ресейдегі елшісі рөлінде Мәскеуде тұрып жатыр).
«Үңгірдегі ұлтшылдар! Сендерге, шамасы, осындай Ресей керек қой!» деп жынын төкті ол өзінің нағыз шовинистік пиғылдағы шенеунік екенін бір сәт есінен шығарып алып.
Оқиға биылғы жылғы 19 мамырда Мәскеу облысындағы Ликино-Дулево қаласында орын алған. Сол күні екі полицей «тентек суға» тойып алып, теңселіп жүрген 45 жастағы өзбек мигрантын «қоғамдық тәртіпті бұзды» деген айыппен ұстайды. Бірақ оны полиция бөлімшесіне жеткізудің орнына, неге екені белгісіз, маңайдағы ормандардың біріне қарай алып кетеді. Кейін өздерінің айтуларынша, мас азаматты «желдің өтіне шығарып, есін жинатып алу үшін» солай еткен көрінеді. Алайда, полицейлер ұсталған жігіттің қасында көп тұрмайды, апарып салған қалың орманның ортасына жалғыз қалдырып кете барады.
Қалтасында ақша да, құжат та, телефон ла, тіпті киім мен аяқ киім де жоқ өзі масаң жігіт болса, сол жерден шығар жол таппай, әбден адасады. Ал тәртіп сақшылары оны келіп, алып кетуді тарс естерінен шығарып алады.
Сол күні де, ертеңіне де еш хабары болмай кеткен туыстарын Өзбекстандағы жақындары дабыл қағып, іздестіре бастайды. Жігіт арада бірнеше күн өткеннен кейін ғана табылады. Онда да денесінің бір бөлігі ғана кезігеді. Оны орманда әртүрлі аңдар жұлмалап жеп кеткен екен.
Депутат Евгений Федоровтың айтуынша, Орехово-Зуево қаласында мигранттың өкінішті өліміне байланысты іле-шала тексеру жүргізіліп, оған екі полицейдің тікелей қатысы бары анықталады. Олар қызметтік лауазымдарын асыра пайдаланғандары үшін дереу қамауға алынады. Енді жақын арада істері сотқа өткізіледі.
