USD
ШИЕЛІ. 6 мамыр. Қызылорда облысы Шиелі кентіндегі арықтан әзірге белгісіз жағдайда жантәсілім еткен қыз баланың мәйіті шықты. Бұл туралы kazinform.kz ақпарына сүйенген rast.kz хабарлайды.
Агенттіктің хабарлауынша, облыстық полиция департаменті аталған жайтқа қатысты адам өлтіру дерегі бойынша қылмыстық іс қозғаған.
Полицияға 3 маусым күні кешкі уақытта Шиелі ауданының ауыл тұрғыны каналдағы шлюз суынан қыз баланың мәйіті табылғанын баяндаған.
«Оқиға орнына полиция қызметкерлері дереу барды. Қыз баланың жеке басы анықталды. Аталған дерек бойынша адам өлтіру дерегімен қылмыстық іс қозғалды», – делінген хабарламада.
Алдын ала анықталғанындай, марқұм туыстарының айтуынша, ол 2 маусым күні кешке үйінен шығып кеткеннен қайтып оралмаған.
«Қазіргі уақытта қылмысты ашу және күдіктіні ұстау мақсатында тәжірибелі қызметкерлерден жедел тергеу тобы құрылды. Оқиғаның мән-жайын анықтауға бағытталған жедел-іздестіру шаралары жүргізіліп жатыр», – деп атап өтті полициядағылар.
Тергеу мүддесіне байланысты сотқа дейінгі тергеп-тексеру деректері жария етілмеді. Тәртіп сақшылары мессенджер арқылы жаппай тараған кісі өлтіру жөніндегі ақпараттың шындыққа жанаспайтынын мәлімдеді.
«Полиция азаматтарды жалған ақпарат таратпауға, тек ресми ақпарат көздеріне сенуге шақырады. Көрінеу жалған ақпарат таратқаны үшін заңнамада жауапкершілік көзделгенін ескертеді. Аталған қылмыстық істі тергеу барысы департамент басшылығының ерекше бақылауында», – делінген ресми хабарламада.
