USD
АСТАНА. 31 тамыз. Мемлекет басшысы Қасым-Жомарт Тоқаев Туризм және спорт министрі Ермек Маржықпаевты қызметінен босатты. Бұл туралы 1bol.kz ақпарына сүйенген rast.kz хабарлайды.
Еске сала кетейік, 27 тамыз күні Президент Қасым-Жомарт Тоқаев Ақордада Париж Олимпиадасының жүлдегерлерімен және спорт саласына жауапты шенділермен кездескен болатын. Онда Мемлекет басшысы Туризм және спорт министрлігі мен Ұлттық Олимпиялық комитет жұмыстарына елеулі сындар айтқан. Соның ішінде спортты жайлаған жемқорлық пен былықтарға едәуір тоқталып, оларды жедел жоюға тапсырма берді.
Ал Туризм және спорт министрі Ермек Маржықпаев болса, осыдан кейін Қазақстан Бокс федерациясының жұмысын сынға алғаннан басқа белсендідік таныта қойған жоқ.
Ермек Маржықпаев 2023 жылдың 2 қыркүйегінде Туризм және спорт министрі болып тағайындалған еді. Енді арада бір жылдай уақыт өткенде, бұл қызметінен босатылып отыр. Ол бұған дейін Ақмола облысының әкімі болып қызмет атқарған еді.
Еске сала кетейік, Қазақстан спортшылары Париж Олимпиадасында небәрі 1 алтын, 3 күміс және 3 қола медаль ала алды.
