Заңгерлер биылғы талапкерлер құқығын қорғау мақсатында мәслихат өткізеді
АЛМАТЫ. 15 тамыз. Ертең оңтүстік мегаполисте бір топ заңгерлер биылғы жылғы талапкерлер құқығын қорғауға арналған баспасөз мәслихатын өткізгелі жатыр. Бұл туралы Адам құқықтары мен заңдылықты сақтау жөніндегі Қазақстан халықаралық бюросына сілтеме жасаған rast.kz хабарлайды.
«2024 жылғы 16 тамыз (жұма), сағат 14:00-де Алматыда «ҚР Ғылым және жоғары білім министрлігі тарапынан заңсыз іс-әрекеттерге байланысты талапкерлердің мемлекеттік гранттар алуға конституциялық құқықтарын бұзу» атты баспасөз конференциясы өтеді», – делінген хабарламада.
Гранттар тізімі жарияланғаннан кейін БАҚ-та сөйлеген сөзінде ҚР Ғылым және жоғары білім министрі Саясат Нұрбек «жақында орын алған су тасқыны бүкіл ел үшін ортақ сынақ болды. Осы жағдайға байланысты біз зардап шеккен аймақтардан келген түлектерге білім беру гранттарының бір бөлігін бөлдік. Барлығы – 5112 грант», – деген еді.
Дәл осы квотаның арқасында талапкерлердің бір бөлігі өздерінің лайықты мемлекеттік гранттарын ала алмады. Бірақ олар төтенше жағдайдан зардап шеккен аймақтардағы талапкерлерге қарағанда, айтарлықтай жоғары балл жинады.
Алайда қолданыстағы заңнаманы талдау барысы министрліктің мұндай квотаны енгізуге және оған гранттар бөлуге ешқандай құқығы жоқ екенін көрсетті! Жоғары оқу орындарында оқуға арналған осындай квоталарды «Білім туралы» заңда Парламент депутаттары ғана белгілей алады. Бүгінгі таңда «ТЖ өңірлері үшін квота» бірде-бір нормативтік құқықтық актіде жоқ. Былайша айтқанда, ол тек министрдің сөзімен ғана шығарылып тұр, сондықтан заңсыз болып саналады. Осылайша, талапкерлер ғылым және жоғары білім министрлігі Қазақстан Республикасының заңдарын, сондай-ақ олардың конституциялық құқықтарын елеулі түрде бұзды деп санайды.
Өтетін уақыты: сағат 14.00
Өтетін орны: Адам құқықтары мен заңдылықты сақтау жөніндегі Қазақстан халықаралық бюросы.
Мекен-жайы: Алматы қаласы, 8 шағын аудан, 4 А үй, 425 кеңсе. Абай даңғылы мен Өтеген батыр көшесінің қиылысы.
