USD
АСТАНА. 26 шілде. Жамбыл облысының бұрынғы әкімі Кәрім Көкірекбаев сот алдында ақталып шыққанына бір жарым ай толғанда, қайта қамауға алынды. Бұл туралы Adyrna.kz ақпарына сүйенген rast.kz хабарлайды.
2013-2018 жылдары Жамбыл облысының әкімі болған Кәрім Көкірекбаев 2022 жылдың соңында «Қазселденқорғау» мекемесін басқарып жүрген кезінде аса ірі көлемде пара алды деген айыппен ұсталған болатын. Алайда биылғы 7 маусымда Төтенше жағдайлар министрлігі аумақтық бөлімшесінің лауазымды тұлғаларына қатысты істі қайта қараған Алматы облысының қылмыстық істер жөніндегі мамандандырылған ауданаралық соты Кәрім Көкірекбаевты ақтап шығарды.
Бұған прокуратура келіспеді. Ондағылар «Қазселденқорғау» мекемесі бұрынғы басшысының ақталуы күмән тудыратынын мәлімдеді. Ал Жоғары Соттың қылмыстық істер жөніндегі сот алқасының төрағасы Назгүл Рахметуллина істің қайта қаралуы мүмкін екенін айтты.
Антикордың мәлімдеуінше, кеше Кәрім Көкірекбаевты ақтау жөніндегі үкімнің күші жойылып, оның өзі сот залында бірден қамауға алынған.
«Биылғы 25 шілдеде Алматы облыстық соты ҚР ТЖМ «Қазселденқорғау» ММ басшысы Қ.Көкірекбаевқа қатысты ақтау үкімінің күшін жойды, қылмыстық іс бірінші сатыдағы соттың жаңадан қарауына жолданды. Сонымен қатар, К. Көкірекбаев сот залында қамауға алынды», – делінген хабарламада.
Еске сала кетейік, Жамбыл облысының бұрынғы әкімі және сол кезде «Қазселденқорғау» мекемесінің басшысы болған Кәрім Көкірекбаев 2022 жылы 27 желтоқсанда ірі көлемде пара алуы кезінде ұсталған еді. Кейін, 2023 жылғы мамыр айында Антикор хабарлағандай, ол кәсіпкерлерден орындалған жұмыстары жөніндегі актілеріне қол қойғаны және көрсеткен барша қамқорлығы үшін жалпы сомасы 396 млн теңге көлемінде пара алған.
