Бокс: Қазақстан ерлер құрамасы Париж Олимпиадасына толық құрамда барады
БАНГКОК. 2 маусым. Бангкоктағы олимпиялық іріктеу турниріндегі жұбаныш кезеңінде бүгін екінші рет жеңіске жеткен Мұхамедсабыр Базарбайұлы Олимпиада квотасына қол жеткізді. Бұл туралы Olympic.kz ақпарына сүйенген rast.kz хабарлайды.
Турнирге Африкадан – 25, Америкадан – 27, Азиядан – 31, Еуропадан – 39, Океания аймағынан – 9 мемлекеттің, барлығы 131 елдің 578 боксшысы қатысуда.
Мұнда ерлер 57, 80 келіге дейінгі салмақтарда – 3, ал 51, 92, +92 келіге дейінгі салмақтарда – 4, сондай-ақ 63,5 және 71 келіге дейінгі салмақтарда 5 квота, әйелдер 60 келіге дейінгі салмақтарда – 3, ал 50, 54, 57, 66, 75 келіге дейінгі салмақтарда 4 квота алады.
Бүгін 63,5 келіге дейінгі салмақтағы Мұхаммедсабыр Базарбайұлы олимпиялық лицензияға қол жеткізіп, Олимпиялық ойындарға баратын Қазақстанның ерлер құрамасының сапын толықтырып берді. Яғни кем болып тұрған жалғыз квотаның орнын толтырды. Бұл үшін ол өз салмағындағы бесінші лицензия үшін өткізілген жұбаныш турнирінің финалында молдован Александр Парасчивті 5:0 есебімен ұтып шықты.
Бұған дейін Мұхаммедсабырдың ширек финалда кубалық Эрисланди Альвареске есе жіберіп қойғаны белгілі. Соның салдарынан жартылай финалға өте алмай қалған төртеудің арасындағы турнирге қатысып, қалған жалғыз бесінші жолдама үшін шайқасуына тура келді. Сол жолда алдымен колумбиялық Хосе Мануэль Виафараны 3:2 есебімен жеңді.
Ал жалпы Бангкок турнирінде ширек финалға дейін Мұхаммедсабыр филиппиндік Кристиан Питт Лаурентені, түрік Мизан Айкөлді, итальян Джанлуиджи Маланганы ұтқан болатын. Сонда ол Таиланд астанасында 6 рет шаршы алаңға шығып, 5 рет жеңіске жеткен болып шығады.
Бүгін алдымен әйелдер арасында Валентина Хальзова (75 кг) мен Назым Қызайбай (50 кг) ширек финалдық шайқастарында жеңіске жетіп, Олимпиялық лизенцияға қол жеткізді. Атап айтқанда, Валентина Хальзова колумбиялық Ширлейдис Оросконы, Назым Солтүстік Корея боксшысы Канг Су Хуангты 5:0 етіп тізе бүктірді.
Құтты болсын! Жеңісті жол Парижде жалғассын!
Сонымен, еліміздің Мырзағали Айтжанов басқаратын ерлер құрамасы Олимпиадаға белгіленген 7 жолдаманы түгел ұтып алды. Ал Елдос Сайдалин басқаратын әйелдер құрамасында 6 жолдаманың 3-уі бар.
Суретте: Мұхаммедсабыр Базарбайұлы лицензиясын қолына ұстап тұр
