Қазақстан Татарстанға шабуыл жасаған дрондарға қатысы жоқ екенін мәлімдеді
АСТАНА. 2 сәуір. Қазақстан Қорғаныс министрлігі Татарстанға шабуыл жасаған дрондардың ел территориясынан ұшып шыққаны жөніндегі ақпарды жоққа шығарды. Бұл туралы The Moscow News ақпарына сүйенген rast.kz хабарлайды.
Бүгін Татарстан ғана емес, күллі Ресей аумағы дүрілдеп те, дірілдеп те жатыр: белгісіз бір дрондар майдан шебінен көп алыста жатқан осы өңірге шабуыл жасап, бірнеше нысанның аумағын өртке ұластырды.
Қазақстан Қорғаныс министрлігі Түбән Кама (орысша – Нижнекамск) мен Алабұға (орысша – Елабуга) қалаларындағы кәсіпорындарға жасалған шабуылға Қазақстанның ешқандай қатысы жоқ екенін айтып, ант-су ішті.
«Кейбір Telegram-арналарда таратылып жатқан Татарстан Республикасындағы нысандарға шабуыл жасаған дрондар Қазақстан территориясынан жіберілді-міс деген ақпарат шындыққа сәйкес келмейді», – делінген ведомство хабарламасында.
Шабуыл Орта Азияның «солтүстік-батыс бөлігіндегі далалық аудандарда» ұйымдастырылуы мүмкін екенін алғаш ауызға алған РФ мемлекеттік думасының қорғаныс жөніндегі комитетінің мүшесі, генерал-лейтенант Андрей Гурулев болды. Бұрыннан Қазақстан хақында оншалықты жақсы сөз айта қоймайтын сабаздың бұған келтірген уәжі де қызық. «Бұл жерлер әуеден де, радиолоакциялық станциялардан да бақылауға алынбайды. Ол жақтан нені болсын өткізіп жібере беруге болады», – деді ол.
Кремль пулінің журналисі Дмитрий Смирнов жаудың дрондарды жіберу үшін Қазақстан территориясын пайдалануы әбден мүмкін екеніне келісетінін білдірді. Ол Түбән Кама мен Алабұғаның бұл елдің шекарасынан 500 шақырым қашықта орналасқанын, ал Украинамен араны 1200 шақырым жер бөліп тұрғанын алға тартты.
Қазақстан Қорғаныс министрлігі «мұндай пәлеқорлық республиканың ішін ала тайдай бүлдіруге бағытталғанын» атап өтіп, азаматтар мен бұқаралық ақпарат құралдарын тарап жатқан бұл өсек-аяңдар мен қауесеттерге мән бермеуге шақырды.
2 сәуір күні Украинаға қарсы басқыншылық соғыс басталғалы бері бірінші рет дрондар Татарстанға дейін ұшып жетті. Алабұғада соққы Иранның Shahed дроны шығарылатын зауытқа, Түбән Камада мұнай өңдеу зауытына берілді.
Украина президенті Володимир Зеленьский бұдан бұрын Украина Қарулы күштері Ресей территориясындағы өнеркәсіп және энергетика нысандарына соққы беретінін мәлімдеген еді. Оның айтуынша, өйткені, Ресей соғыс басталғалы бері дәл солай етіп келе жатыр.
