USD
ҚЫЗЫЛОРДА. 24 наурыз. Қызылорда облысының спорт саласында бірқатар жемқорлық фактілерінің ізі бар екені анықталып отыр. Бұл туралы Halyq Uni ақпарына сүйенген rast.kz хабарлайды.
Мұның жай-жапсары бұрнағы күні Сыбайлас жемқорлыққа қарсы қызметтің Қызылорда облысындағы департаментінің бастамасымен өткен қоғамдық кеңес жанынан құрылған сыбайлас жемқорлыққа қарсы комиссия отырысында айтылды.
Іс-шараға ведомство басшысының бірінші орынбасары Асылхан Ашиков, «Әділдік жолы» республикалық қоғамдық бірлестігі Қызылорда облыстық филиалының басшысы Ләззат Бақтыбаева, Қызылорда облысы әкімі аппараты басшысының орынбасары Ерлан Бәкіров, аталған комиссия мүшелері және облыстың спорт, білім басқармаларының басшылары қатысты.
Отырыста өңірлік Антикор басшысының бірінші орынбасары Асылхан Ашиков облыстың дене шынықтыру, спорт және туризм басқармасы мен оған қарасты мекемелердің қызметіндегі сыбайлас жемқорлық тәуекелдеріне жүргізілген сыртқы талдау нәтижелері жөнінде баяндама жасады. Онда спорт саласындағы сыбайлас жемқорлық тәуекелдері, оның ішінде қаржылық жоспарлаудағы, «Қайсар» футбол клубы қызметіндегі және спорт мектептеріндегі тәуекелдер мен проблемалық мәселелер атап өтілді.
Атап айтқанда, талдау барысында өңірдің бірқатар спорт мектебінің есепшілері бюджет қаражатын өз есепшоттарына артық аударып алу, оқу-жаттығу жиындарына бөлінген қаражатты тиімсіз пайдалану, еңбекақы лимитін сақтамау, жаттықтырушылардың жалған дипломмен жұмыс істеу және т.б. фактілері анықталғаны белгілі болды. Соның салдарынан департамент салада сыбайлас жемқорлық тәуекелдерін жою және алдын алу мақсатында 17 ұсыным енгізді.
Жиында сондай-ақ білім беру саласының бюджет қаражатын жоспарлау және игеру барысындағы сыбайлас жемқорлық тәуекелдерінің алдын алу мәселелері талқыланды.
Отырыс барысында облыстың спорт және білім басқармасы басшыларының күн тәртібіндегі мәселелер бойынша есептері тыңдалды.
Алдағы уақытта департамент сыбайлас жемқорлықтың алдын алу шаралары бойынша қоғамдық кеңес мүшелерімен бірлескен жұмысты жалғастыратын болады.
