Бүгін Грекиямен ойнайтын Қазақстан құрамасының құрамы анықталды
АФИНА. 21 наурыз. Ұлттар лигасында Грекияға қарсы ойында Қазақстан құрамасына шақырту алған футболшылардың нақты тізімі жарияланды. Бұл туралы Stan.kz дерегіне сүйенген rast.kz хабарлайды.
Қазақстан құрамасы 8 наурыздан бері Дубайда бірлескен оқу-жаттығу жиынын өткізіп, алдағы кездесуге дайындалды. Қазақстандықтар оның аясында Түрікменстан құрамасымен жолдастық кездесу өткізіп, 2:0 есебімен жеңіске жетті.
Құраманың бас жаттықтырушысы Магомед Адиев 21 наурыз күні Ұлттар лигасының плей-офф кезеңі шеңберінде Грекиямен өткізілетін матчқа шақырылған ойыншылардың аты-жөндерін атап өтті.
Құрама сапына шақырылғандар тізімін мына футболшылар құрады:
Қақпашылар: Игорь Шацкий («Ақтөбе»), Бекхан Шайзада («Ордабасы»), Данил Устименко («Қайрат»);
Қорғаушылар: Александр Марочкин, Ян Вороговский, Марат Быстров (үшеуі де – «Астанадан»), Еркін Тапалов, Роман Асранкулов, Руслан Валиуллин (үшеуі де – «Тобылдан»), Сергей Малый, Темірлан Ерланов (екеуі де – «Ордабасыдан»), Бағдат Қайыров, Әділхан Таңжарықов (екеуі де – «Ақтөбеден»), Нұралы Әліп («Зенит», Санкт-Петербург, Ресей);
Жартылай қорғаушылар: Рамазан Оразов, Максим Самородов (екеуі де – «Ақтөбеден»), Абзал Байсебеков, Исламбек Қуат, Эльхан Астанов (үшеуі де – «Астанадан»), Асхат Тағыберген, («Ордабасы»), Әділет Садыбеков («Қайрат»), Ислам Чесноков («Тобыл»), Бақтиер Зайнутдинов («Бешикташ», Ыстанбұл, Түркия), Александр Зуев («Арсенал», Тула, Ресей);
Шабуылшылар: Рамазан Кәрімов («Астана»), Абат Айымбетов («Адана Демирспор», Адана,Түркия).
Кеше Қазақстан құрамасы Грекиямен матч өткізу үшін Афинаға келіп жетті.
Ойын бүгін, наурыздың 22-не қараған түні Астана уақытымен 00:45-те басталады. Ұтқан команда келесі жартылай финалдық жұп – Грузия – Люксембург арасындағы матчтың жеңімпазымен 26 наурызда ойнап, Еуропа чемпионатының жолдамасын сарапқа салады.
Құрлық біріншілігі биылғы 14 маусым – 14 шілде аралығында Германияда өтеді.
Матч бүгін Астана уақытымен 00:35 сағаттан бастап Qazaqstan және Qazsport телеарналарынан тікелей эфирде көрсетіледі.
