USD
МӘСКЕУ. 16 наурыз. Ресейде президент сайлауын жүргізіп жатқан сайлау учаскелеріне от қою деректері барған сайын көбейіп келеді. Бұл туралы The Moscow News ақпарына сүйенген rast.kz хабарлайды.
Қазірге дейін мұндай оқиғалар Ресейдің кемінде алты өңірінде кең етек алып тұрғаны анықталды. Тағы тоғыз уәлаятта сайлау учаскелерін жасыл дәрімен (зеленка) және сиямен бояп кету фактілері тіркелді. The Moscow Times ресурсы мұндай жағдайдың бірінші сайлау күні 15-тен астам дерегі орын алғанын анықтады.
Мариндегі учаскеде мәскеулік кемпір дауыс беру будкасына от қойып, оны өз телефонына түсіріп алған.
Санкт-Петербургте 21 жастағы бойжеткен таң атқанннан екі сайлау учаскесі жұмыс жасап жатқан 358-ші мектепке түс кезінде келіп, оған «Молотов коктейлін» лақтырған.
Тағы бір от қою оқиғасы Когалым қаласындағы №484 сайлау учаскесінде орын алған. Бір әйел тұтанғыш сұйық құйылған шынының көмегімен дауыс беру жәшігін өртемекші болған.
Иваново қаласындағы бір мектепте орналасқан сайлауы учаскесінде жасы ұлғайған әйел дауыс беру урнасын өртеп кеткен.
Мәскеу түбіндегі Мытищы қаласында 83-тегі әйел өзінің үстіне бензин құйып, от қойып, сол қалпында дауыс беру будкасына кірген. Абырой болғанда, өртті дер кезінде сөндіріп, кейуананы аман алып қалудың орайы келген.
Свердлов облысындағы Асбест қаласында сайлау учаскесі орналасқан ғимарат өртелген. Өрт әрең сөндірілген.
Челәбіде 80 жастағы әйел сайлау учаскесіне келгенде қол сөмкесінен отшашу шығарып, оны тұтандырған. «Баспана ішін отшашу алып кетті», – деп атап өтті бір куәгер мұны.
Мұндай оқыс оқиғалар сайлаудың бірінші күні, яғни 15 наурызда Мәскеуде, Симферопольде, Ростовта, Қарашай-Шеркесте, Волжскіде, Сочиде және тағы бірқатар елді мекендерде орын алды.
Сайлау учаскелерін жасыл дәрімен немесе сиямен бояп кетуге тырысушылық фактілері де көптеп кездесті.
Енді осындай тәртіп бұзушылықтармен ұсталғандарды төрт жылға дейін бас бостандығынан айырылу жазасы күтіп тұр. Бірақ адамдар (негізінен – әйелдер) соны біле тұрып, осындай жанкешті әрекеттерге тайсалмай барған.
Ресейде еркектерден гөрі қыз-келіншектер әрі батыл, әрі тәуекелшіл болып шықты.
