Пашинян Путиннің әскери блогы Арменияның басты қатері екенін айтты
ЕРЕВАН. 1 наурыз. Армения премьер-министрі Никол Пашинян Ұжымдық қауіпсіздік шарт ұйымы (ҰҚШҰ) Ереванға қатер төндіретінін мәлімдеді. Бұл туралы «Новости Армении» ақпарына сүйенген rast.kz хабарлайды.
«ҰҚШҰ қауіпсіздік саласында өзінің Армения алдындағы міндеттемесін орындаудың орнына, керісінше қауіпсіздік проблемаларын тудырады. Бұл позиция, турасын айтқанда, Арменияның ұлттық қауіпсіздігінің қатері болып табылады», – деді Пашинян агенттік тілшісіне.
Оның айтуынша, ҰҚШҰ Арменияның қауіпсіздігі мәселесі жөніндегі міндеттемесін орындамай, бұған мүлде қарама-қарсы позиция ұстанған.
Бұдан алдын Пашинян Арменияның ҰҚШҰ-ға мүшелігін тоқтатып қойғанын мәлімдеген еді. «Сіздер білесіздер ме, ұжымдық қауіпсіздік шарты іс жүзінде Арменияға қатысты жұмыс істемейтінін 2021-2022 жылдарғы оқиғалар байқатты. Мұны аңғармай өте шығу мүмкін емес еді. Сондықтан қазір біз шын мәнінде бұл ұйымға мүшелігімізді тоқтатып тұрмыз», – деді Армения премьер-министрі француздың France 24 телеарнасына берген сұхбатында.
Өткен сәрсенбіде Никол Пашинян Ереванның ҰҚШҰ-да тұрақты өкілі жоқ екенін және оның шараларына көптен бері қатыспай келе жатқанын айтты. Мұның басты себебі, Арменияның бұл ұйымнан алатын ештеңесі жоқ деп түсіндірді ол. «Керісінше Путиннің бұл әскери блогы біздің тәуелсіздігімізге қатер төндіретін сияқты», – деді сосын Пашинян.
