Әйелін қатыгездікпен өлтірді деп айыпталған Бишімбаевтың ісі сотқа түсті
АСТАНА. 26 ақпан. Әйелін асқан қатыгездікпен ұрып өлтірді деген ауыр айып тағылып отырған экс-министр Қуандық Бишімбаевтың ісі сотқа жолданды. Бұл туралы «Адырна» дерегіне сүйенген rast.kz хабарлайды.
Ақпаратты жәбірленуші жақтың адвокаты Жанна Мұхамади таратты. Оның айтуынша, атышулы істің нүктесі Астана қаласының қылмыстық істер жөніндегі мамандандырылған ауданаралық сотында қойылады.
Осы ретте Астана қалалық соты іске тартылушылар қатарында Қуандық Бишімбаевтан бөлек Бақытжан Байжановтың да бар екенін растаған. Бұлардың соңғысының ісі де сотқа келіп түскен.
Марқұм Салтанат Нүкенованың «өліміне қатысы бар» деген күдікке ілінген Бишімбаевқа Қылмыстық кодекстің 99-бабы 2-бөлігінің 5-тармағы (адам өлтіру, басқа адамға қатысты құқыққа қарсы қасақана аса қатыгездікпен жасалған адам өлтіру), 110-бабы 2-бөлігінің 1-тармағы (ұрып-соғу немесе өзге де зорлық-зомбылық әрекеттері арқылы физикалық және психикалық қинау) бойынша айып тағылған.
Ал оған осы істе көмектескен Бақытжан Байжановқа Қылмыстық кодекстің 432-бабы (аса ауыр қылмысты күні бұрын уәделеспей жасырып қалу), 434-бабы (аса ауыр қылмыс жасағаны туралы хабарламау) бойынша айып тағылған.
Еске сала кетейік, қайғылы оқиға өткен жылғы 9 қараша күні Астанадағы «Бау» ресторанында орын алды. Осында әйелімен бірге келіп, бір тәулікке жуық уақыт демалған экс-министр Қуандық Бишімбаев жан төзгісіз қылмысқа барды. Ол жұбайы Салтанат Нүкенованы үздіксіз ұрып, соққыға жығуы салдарынан оның өліміне себеп болған. Таңертең ессіз жатқан әйелге тек кешке қарай ғана «жедел жәрдем» шақырған. Бұл кезде марқұмның әлдеқашан бақилық болып кеткені айғақталады. Содан кейін күдікті тек 11 қараша күні ғана қамауға алынды.
Соңғы деректер қылмыстық істі Астана қаласының қылмыстық істер жөніндегі ауданаралық сотының судьясы Айжан Құлбаеваның қарайтынын білдіреді. Ол бұған дейін де бірқатар шулы істерді қараған. Бұлардың қатарында журналист Махамбет Абжанға қатысты іс бар. Ол 9 жылға бас бостандығынан айырылды. Еңбек және халықты әлеуметтік қорғау вице-министрі болған Нұржан Әлтаев 10 жылға кесілді. Қазір «Атамекен» ұлттық кәсіпкерлер палатасының бұрынғы басқарма төрағасы Абылай Мырзахметовке қатысты істі қарап жатыр.
Айжан Құлбаева 2022 жылдың 28 желтоқсанында Астана қаласының қылмыстық істер жөніндегі мамандандырылған ауданаралық сотының төрағасы болып тағайындалған.
