Кремль Навальный өлімін халықаралық деңгейде тексертуден бас тартты
МӘСКЕУ. 20 ақпан. Ресей билігі оппозиционер Алексей Навальныйдың өлімі себебін халықаралық деңгейде зерттеу жөніндегі ұсынысқа келіспеді. Бұл туралы The Moscow News ақпарына сүйенген rast.kz хабарлайды.
«Ресей оппозициядағы саясаткер Алексей Навальныйдың өліміне тәуелсіз халықаралық деңгейде тексеру жүргізгелі отырған жоқ», – деді ПФ президентінің баспасөз хатшысы Дмитрий Песков.
«Біз мұндай талапқа мүлде келіспейміз, әсіресе, ол Боррель мырзадан шығып отырса», – деді ол «РИА Новости» агенттігіне. Бұдан алдын Песков батыс саясаткерлерінің мұндай ұсыныстарына Мәскеудің жол бере алмайтынын мәлімдеген еді.
Еуропа кеңесінің басшысы Жозеп Боррель саясаткер өліміне Ресей билігінің тікелей жауапты екенін баяндады. Ол мұндағы бар жауапкершіліктің Владимир Путиннің мойнында екенін атап көрсетті.
Ресейдің Федералды жазаларды өтеу қызметінің Ямал-Ненец басқармасының әкімшілігі саясаткер Алексей Навальныйдың 16 ақпан күні күндіз Харп кентіндегі №3 түзету колониясында қайтыс болғанын хабарлаған еді. Ведомстволағылар саяткердің серуен кезінде өзін нашар сезініп, есінен танып қалғанын баяндады. Жарты сағат бойы жан сақтау әрекеттерін жасаған дәрігерлер оны аман алып қала алмады.
Осыдан кейін Навальныйдың денесі Харптегі колониядан Салехардқа жеткізілді. Ресей тергеу комитетінің өкілдері саясаткердің адвокаты мен анасына оның мәйіті 14 күнге созылатын химиялық сараптамаға жіберілгенін мәлімдеді. Соған дейін оны ешкім ала алмайды.
