АҚШ сенаторлары Украинаны қаржыландыруға шешім қабылдады
УАШИНГТОН. 9 ақпан. АҚШ Сенаты иммиграция саясаты реформасын ысырып қойып, Украина мен Израильді қаржыландыра беретін болып шешімге келді. Бұл туралы The Moscow News ақпарына сүйенген rast.kz хабарлайды.
«Республикашылардың талабы бойынша Уашингтонның әскер күшімен АҚШ-тың шекарасына бақылау орнату жөнінде реформа жасауға алып баратын, төрт ай бойы дайындалған заң жобасы сәрсенбі күні өтпей қалды», – делінген хабарламада.
Украинадағы ахуалдың нашарлай түсуіне алаңдаған конгресмендер бұрын бастаған істеріне қайта оралып, шекара жайлы бапты алып тастап, ұлттық қауіпсіздікті қамтамасыз ету туралы заң жобасының Украинаны, Израильді және Тайванды қаржыландыруды қарастыратын бөлігін дауыс беруге ұсынды.
Мәселеге бұлай келу Сенатта қолдау тапты: онымен палатаның 67 мүшесі (50-і демократтар, 17-і республикашылар) келісті. Ал содан бір күн бұрын заң жобасын тұтастай қабылдауға тек 58 депутат (қажеттісі 100-ден 60 дауыс) қана дауыс берген еді. Республикашылар (Дональд Трамптың партиясы) арасында Украинаға жаңа қаржылай көмек беруге екінші мәрте қарсы шыққандар бар.
Заң жобасы әзірге жалпы сомасы $95 млрд болатын ақшаны қарастырып отыр. Оның 60 миллиарды Украинаға, 14,1 миллиарды Израильге беріледі.
