Назарбаевтың тұғырдан құлауы бейнеленген мүсіндері үшін суретші сөз естіген
АЛМАТЫ. 3 ақпан. Суретші Ербосын Мелдібеков экс-президент Назарбаевтың құлау кезеңін бейнелейтін тас мүсіндер сериясы үшін қоқан-лоққы естігенін айтты. Бұл туралы Dalanews.kz ақпарына сүйенген rast.kz хабарлайды.
Ақпанның 1-і күні Алматыдағы Әскерилер үйінде суретші Ербосын Мелдібековтің «Боран – Байқоңыр, Жібек жолы мен Құс жолының арасы» атты жеке көрмесі ашылды.
Бұл іс-шарада бұрынғы президент Нұрсұлтан Назарбаевтың ескерткішінің құлап бара жатқанын бейнелейтін «Падение автора» атты өнер туындысы көпшіліктің назарыын аударды. Тіпті, оның видеосы мен суреттері желіге тарап кетті. Алайда, экс-біріншінің жақтастары авторға қоқан-лоқы көрсетіп жатқан көрінеді.
«Менің бұл туындым бар болғаны Талдықорғандағы бір ескерткіштің тағдырын бейнелейді. Қаңтар бүлігі кезінде құлаған ескерткіш бар-жоғы үш секундтың ішінде жермен-жексен болды ғой. Бар болғаны соны бейнеледім. Яғни, ситуацияға саяси емес, өнер жағынан қарадым. Сондықтан бұған бола мені жазғыру орынсыз деп білемін. Олай болса, репрессия, концлагер туралы ақындар мен режиссерлерге айтқызбай, жазғызбай қойсын», – деді Ербосын Мелдібеков NEGE тілшісіне.
Ол осы мүсінді жасау үшін банктен несие алғанын да жасырмады.
Әлеуметтік желіде суретшінің осы мүсіндер сериясы түсірілген видео да тарады.
