Әбиба Әбужақынова Португалияда Гран-при турнирінің қола жүлдесін алды
ЛИССАБОН. 27 қаңтар. Қазақстандық дзюдошы Әбиба Әбужақынова Португалияда өтіп жатқан әлем Гран-при турнирінің қола медальге қол жеткізді. Бұл туралы Sports.kz ақпарына сүйенген rast.kz хабарлайды.
Халықаралық турнирде 48 келіге дейінгі салмақ дәрежесінде татамиге шыққан ол жұбаныш финалында түрік қызы Сила Эрсиннен басым түсті. Бұл оған қола медальді қамтамасыз етіп берді.
Әбиба іріктеу кезеңінде нидерландтық Эмбер Херчес пен француз Лаура Эспадинханы қапы қалдырды. Бірақ ширек финалда жапон Кано Миякиге жол беріп қойды. Одан кейін жұбаныш белдесуінде бельгиялық Лоис Петитті тізе бүктіріп, үшінші орын үшін күресуге жол беретін кіші финалға жолдама алды.
Айта кетуіміз керек, Португалияның Одивелаш қаласында басталған Гран-при сайысы дзюдодан 2024 жылғы маусымның алғашқы ресми рейтингтік жарысы болып саналады. Турнирге әлемнің 90 елінен 624 дзюдошы қатысып жатыр.
Біздің анықтама. Әбиба Рахмонәліқызы Әбужақынова 1997 жылы 4 шілдеде Өзбекстанда туған. 11 жасынан бері дзюдомен шұғылданып келеді. Ташкентте тұрып, жаттықты. Содан кейін бір өзі Алматыға келіп, республикалық спорт колледжіне оқуға түсті. Осы кезден бастап түрлі республикалық және халықаралық жарыстарға қатыса бастады.
Әбиба – Азия чемпионатының 2021, 2022 жылдарғы күміс жүлдегері, ал 2022 жылы Ташкентте өткен әлем чемпионатында қола медаль алды. Ол 2023 жылы Португалияда өткен Гран-при сериясында жеңімпаз атанып, осындай беделді турнирді жеңіп алған алғашқы қазақстандық спортшы қыз болды.
Әбибаның ерекше ескеріп, айрықша айтып өтетін тағы бір үлгілі жағы: ол қандай бір жарыстан кейін де журналистердің қойған сұрақтарына тек қазақ тілінде жауап береді, әлдекімдерге жақсы көрінгісі келіп, орысша тілін майыстырып тұрмайды
