Белгород облысында тұтқындарды әкеле жатқан әскери ұшақ атып түсірілді
МӘСКЕУ. 24 қаңтар. Ресейдің Белгород облысында бортында соғыс тұтқындары бар Ил-76 әскери ұшағы жерге құлап түсті. Бұл туралы The Moscow News дерегіне сүйенген rast.kz хабарлайды.
Белгород облысының губернаторы Вячеслав Гладков ұшақтың бортында отырғандардың бәрі оқиға орын алған жерде қаза тапқанын баяндады. Оның айтуынша, лайнер Корочан ауданының бір елді мекені жанындағы алқапқа құлаған. «Қазір ұшақ қалдығы жатқан аумақ қоршауға алынды. Барлық жедел қызметтер сонда, тергеу шаралары жүруде. Оқиға орнына оның себебін анықтау үшін комиссия бара жатыр», – деп жазды Гладков телеграм-арнасында.
Әскери-көлік ұшағының құлағанын РФ қорғаныс министрлігі растады. Ведомствоның мәліметінше, оқиға Мәскеу уақытымен 11:00 сағатта орын алған. Оның бортында Белгород облысында алмастырылуға апара жатқан 65 украин тұтқыны, сондай-ақ экипаждың 6 мүшесі мен РФ армиясының 3 қызметкері болған.
«Әскери ұшақ «Patriot немесе IRIS-T қаруларынан атылған үш ракетамен» атып түсірілген», – деді РФ мемлекеттік думасының қорғаныс комитетінің басшысы Андрей Картополов. Оның айтуынша, құлап түскен ұшақтың соңында 80 тұтқыны бар тағы бір ұшақ ұшып келе жатқан. Shot телеграм-арнасының жазуынша, бүгін, 24 қаңтарда Белгород облысының Украинамен шекарасында екі жақтың соғыс тұтқындарын алмастыру процесі өтуге тиіс болған екен.
Инциденттен кейін «Украинская правда» және «РБК-Украина» басылымдары өз әскери мәнбелеріне сілтеме жасап, Белгород облысында құлаған Ил-76 ұшағының соғыс тұтқындарын емес, Харьковты бомбылауға арналған С-300 зенит-ракета кешенін алып бара жатқанын, сондықтан оны Украина Қарулы күштері атып түсіргенін жазды.
