Путин Ресей армиясын тағы 170 мың ресейлікпен толықтыруды талап етті
МӘСКЕУ. 2 желтоқсан. Ресей президенті Владимир Путин бір жарым жылдың ішінде екінші мәрте армия қатарын күрт ұлғайтуға бұйрық беріп отыр. Бұл туралы The Moscow News ақпарына сілтеме жасаған rast.kz хабарлайды.
Узурпатор бұған РФ армиясы Екінші дүниежүзілік соғыстан кейінгі уақытта қатты қырғынға ұшырап отырғанына байланысты амалсыз барып отыр.
Кеше, 1 желтоқсан, жұма күні Путин РФ қарулы күштерінің штаттық санын 2, 209 миллион адамға дейін ұлғайту туралы жарлыққа қол қойды. Кремль сайтында жарияланған құжатқа сәйкес, әскери қызметкерлердің жалпы саны енді 1,32 миллион адамға дейін көбейтілуі керек. Бұл – Путиннің 2022 жылдың тамызында қол қойған мұның алдындағы осындай жарлығында талап етілгеннен 170 мың адамға көп. Сол жолы қарулы күштер 2,039 млн адамға, ал әскери қызметкерлер 1,15 млн адамға ұлғайтылып еді.
Ресейдің оккупациялық армиясы Украинаға шабуыл жасаған кезде оның құрамында 1,9 млн адам бар-тын, олардың 1,01 миллионы әскери қызметкерлер болатын.
РФ қорғаныс министрлігі жарлыққа түсіндірме бере отырып, армияның штаттық санының өсуін «арнайы соғыс операциясына байланысты Ресейге қауіп-қатерлердің артуымен және НАТО-ның кеңеюі жалғасып келе жатуымен» байланыстыра түсіндірді.
