USD
МӘСКЕУ. 28 қараша. Соңғы қараша Ресей оккупациялық армиясының соғыс басталғалы бергі ең көп қырғынға ұшыраған айы болғалы тұр. Бұл туралы The Moscow News дерегіне сүйенген rast.kz хабарлайды.
Донецк облысындағы Авдеевка қаласы Ресей солдаттарының өлігі ең көп көмілген зиратты аймағы болып қалуы ықтимал. Ондағы қырылған орыс басқыншыларының саны Бахмуттағыдан да асып барады.
Донецк қаласына жақын орналасқан елді мекен қазір түгел қан сасиды. Оккупациялық армия сонда да айылдарын жияр емес. Ол қалаға осы күндері өлген-тірілгендеріне қарамай, бір мезгілде алты бағыттан шабуыл жасап жатыр. Украин қорғаушылары, әлбетте, соққының бәрін қайтпас қайсарлықпен тойтара білуде.
Украина Қарулы күштері бас штабының бағамы бойынша, Ресей армиясы қараша айында орта есеппен күніне 931 адамынан өлідей айырылып тұр. Бұған дейін ресейліктер үшін ең ажалды кезең биылғы жылғы наурыз айы болып саналып келіп еді. Сол кезде Бахмут түбінде орыстардың орта есеппен күніне 776 адамы өлген екен.
Ұлыбритания Қорғаныс министрлігінің барлау қызметі бұл бағамдардың нақты шындыққа жақын келетінін растады.
