Қызылжарда «Халық кеңесінің» төрт мүшесі сот арқылы жазаға тартылды
ҚЫЗЫЛЖАР. 28 қараша. Бүгін Қызылжарда Қазақстаннан «тәуелсіздік» алу үшін құрылған «Халық кеңесі» деген сепаратистік ұйымның төрт мүшесіне қатысты сот үкімі шықты. Бұл туралы «Азаттық радиосының» ақпарына сүйенген rast.kz хабарлайды.
Қызылжарда сепаратизм айыбы тағылған «Халық кеңесінің» мүшелері сот арқылы бас бостандықтарынан айырылды. Төрт айыпталушы жеті жылдан тоғыз жылға дейін сотталды.
Еске сала кетейік, қылмыстық іске биылғы 19 наурызда Солтүстік Қазақстан облысының орталығындағы бір колледжде өткен жасырын жиын себеп болған. Онда бір топ сепаратшылар «Еңбекшілердің халық кеңесі» деп аталатын ұйымның өзін өзі құрғаны жайлы жариялаған. Кейін прокуратурадағылар мәлім еткендей, «Халық кеңесінің» мүшелері өздерінің Қазақстан мемлекетінің құрылуын легитимді және заңды деп санамайтыны, оның тәуелсіздігін мойындамайтыны хақындағы заңсыз декларацияға қол қойған. Олар Қазақстанды «корпорация» деп кемсітіп атап, өздерінше «қазіргі басқару жүйесіне күмән келтірген», соған орай «өз тәуелсіздіктерін жариялаған».
Наурыздың аяғына қарай әлеуметтік желіге кеңінен тарап кеткен осы жиын жөніндегі видео қоғамда қызу талқыға түсті. Жұртшылық өкілдері республиканың әр қаласында жиын өткізгендерді «сепаратизмдік әрекеттері» үшін жауапқа тартуды талап етті. Мәжіліс депутаттары бас прокуратурадан істің мәнісін жіті тексеруді сұрады. Соңынан арнайы сараптама «Халық кеңесі» қатысушыларының іс-қимылдарынан «сепаратизм белгілері анықталды» деген қорытынды шығарды. Наурыздың соңында ҰҚК-ның Солтүстік Қазақстан облысындағы департаменті олардың сепаратистік ісі бойынша тергеуді жедел қолға алды.
Ал заңсыз ұйым мүшелеріне арналған сот процесі 6 қараша күні басталды. Істі қарау Қызылжар қалалық сотының судьясы Алмас Жұмағазинге жүктелді.
Осы тұста айыпталушылар орындығына 48 жастағы автослесарь, ұйым жетекшісі Вячеслав Зудерман, өзін өзі жұмыспен қамтушы 40 жастағы Елена Болдырева, 52 жастағы мұғалім Мәдина Қапарова және 37 жастағы саудагер Ольга Бережнова отырды.
Процесс барысында Бережнованың «кеңес» мүшелеріне куәлік пен символика дайындап, жиналғандарды декларациямен таныстырғаны айтылды. Ал декларацияны Зудерманның өзі жазып шыққан.
«Кеңестің» басқа мүшелері сотқа куәгер ретінде қатыстырылды.
Соңынан сот үкімі бойынша, Вячеслав Зудерман – тоғыз жылға, Елена Болдырева, Мәдина Қапарова және Ольга Бережнова жеті жылдан түрмеде отыру жазаларына кесілді.
Судья төрт адамды «Қазақстанның конституциялық құрылымын күштеп өзгертуге үгіттеді» деген және «сепаратизм» айыптарымен кінәлі деп тапқан. Ал Зудерманға сонымен қатар заңсыз қару сақтады деген айып таққан.
Сотта айыпталушылар өздеріне тағылған айыптарды мойындамай, «қала мәселесін шешіп, адамдарға көмектесу үшін жұмысшылардың халық кеңесін құрмақ болғанын» айтып, біраз сандалып баққан. Бірақ олардың қол қойған декларациясы мүлдем мұндай мәселені қозғаған жоқ еді.
Сот үкімі әлі күшіне енген жоқ, сондықтан тараптардың апелляциялық шағым түсіру құқықтарын пайдалана алатын уақыттары бар.
